ЭМЯ-ны ээлжит мэдээллийн үеэр ЭХЭМҮТ-ийн хүүхдийн зөвлөх поликлиникийн эрхлэгч У.Цэвэгмид мэдээлэл өглөө.
Тэрээр “Одоогоор томуу төст өвчин идэвхтэй байна. Харин томуугийн вирус хараахан эргэлтэд орж ирээгүй байна. Эмнэлэгт хандаж буй хүүхдүүдийн дунд энтеровирус буюу гар хөл амны өвчин болон риновирусийн шалтгаантай өвчлөл зонхилж байна. Энтеровирусээр ихэвчлэн бага насны хүүхэд өвчлөх бөгөөд хоолой залгиурт идээт үрэвсэл гарах мөн гар хөлийн хэсэгт цэврүүтэй тууралт гарна. Түүнчлэн халуурах, хэвлийгээр базлах, суулгалт бөөлжилт хэлбэрээр илрэх тул яаран антибиотик хэрэглэхгүй байхыг зөвлөж байна.
Харин риновириус долоодугаар сараас бүртгэгдэж эхэлсэн бөгөөд тус вирус хамрын салстад байрлаж, биеийн дулаан 33-35 хүрмэгц идэвхждэг. Тиймээс есдүгээр сард цаг агаар сэрүүссэн тул тус вирус идэвхжсэн. Бага насны хүүхдэд дараах хүндрэлүүдийг өгдөг. Тухайлбал,
Дунд чихний үрэвсэл буюу чихээр хатгуулах
Хамрын хөндийн үрэвсэлтэй хавсрах тохиолдол байна.
Тиймээс вирусийн онцлогоос хамаарч томуу төст өвчний шинжүүд илэрдгийг эцэг эхчүүд ойлгох хэрэгтэй. Томуу төст өвчин тэр дундаа риновирус даарсантай холбоотой идэвхжиж, биеийн дулаан өсөхөд идэвхгүй болдог. Иймд бага насны хүүхдийг ханиад хүрсэн үед бүлээн шингэн уулгаж, биеийн дулааныг өсгөхөд дэмжихийг зөвлөж байна.
Томуугийн вирус 12-р сарын дундаас идэвхжиж эхэлдэг. Энэ нь томуу төст өвчнөөс хоруу чанар өндөртэй бөгөөд бүх насныхныг хамарч өвчлүүлэх эрсдэлтэй байдаг. Тиймээс томуугийн улирал ирж буйтай холбогдуулан бага насны хүүхдийг дулаан хувцаслах, тэжээллэг хоол хүнс хэрэглэх, дархлааг дэмжих, хооллохын өмнө гараа тогтмол угааж хэвших, амны хаалт зүүхийг уриалж байна” гэлээ.
