Нийслэлийн Эрүүгийн хэргийн давж заалдах шатны шүүхийн 2020 оны 10 дугаар сарын 22-ны өдөр УИХ-ын гишүүн асан Б.Ундармаад холбогдох хэргийг хянан хэлэлцээд, түүний хорих зүйл заалтыг хүчингүй болгожээ.
Түүнийг улс төрд нөлөө бүхий этгээд албан үүрэг, бүрэн эрх, албан тушаалын байдлаа урвуулан ашиглаж, өөртөө буюу бусдад давуу байдал бий болгож Жижиг дунд үйлдвэрлэлийг дэмжих сангаас өөрийн хамаарал бүхий аж ахуй нэгжид зээл олгуулсан гэмт хэрэгт хатгагчаар хамтран оролцсон гэх үндэслэлээр шүүсэн юм.
Ингэхдээ, анхан шатны шүүхээс түүнд Эрүүгийн хуулийн ерөнхий ангийн 3.1 дүгээр зүйлийн 2, 3.4 дүгээр зүйлийн 1 дэх хэсэгт заасныг тус тус журамлан мөн хуулийн тусгай ангийн 22.1 дүгээр зүйлийн 3 дахь хэсэгт зааснаар Б.Ундармаагийн нийтийн албанд томилогдох эрхийг 6 жилийн хугацаагаар хасаж, 2 жил 6 сарын хорих ял оногдуулж шийдвэрлэсэн байдаг.
Нийслэлийн Эрүүгийн хэргийн давж заалдах шатны шүүх Б.Ундармаад холбогдох хэргийг хянан хэлэлцээд,
Б.Ундармаагийн анх удаа гэмт хэрэг үйлдсэн, гэм буруугаа хүлээн зөвшөөрсөн, гэмт хэргийн улмаас учирсан хохирлоо нөхөн төлсөн болон эрүүл мэндийн байдлыг харгалзан үзэж Б.Ундармааг нийтийн албанд томилогдох эрхийг 6 жилийн хугацаагаар хасаж, 40.000.000 төгрөгөөр торгох ял оногдуулж анхан шатны шүүхийн шийтгэх тогтоолд өөрчлөлт оруулж шийдвэрлэжээ.
Албан бус эх сурвалжийн мэдээлж буйгаар УИХ-ын гишүүн асан Б.Ундармаа хүнд өвчтэй. Энэ нь түүнийг суллах голлох шалтгаан болсон гэв.
