Францын Терроризмтой тэмцэх албаны дарга Жан-Франсуа Рикардын мэдээлснээр халдлага үйлдсэн этгээд нь 1999 онд төрсөн, Тунис гаралтай цагаач иргэн байсан аж. Гэмт этгээд нь есдүгээр сарын 20-ны өдөр Африкаас ирэх цагаачдын гол урсгал болох Италийн Лампедузад арлаар дамжин Европ тивд хөл тавьсан байна. Тунисийн аюулгүй албаны эх сурвалж Францын цагдаагийн байгууллагад халдлага үйлдэгч нь Брахим Ауисауи гэх этгээд байсан гэж мэдээлжээ.
Жан-Франсуа Рикард уг хэргийн нөхцөл байдалтай холбоотойгоор хэвлэлийн бага хурал хийх үеэрээ “Халдлага үйлдэгч этгээд пүрэв гаригийн өглөө Ницца хотод галт тэргээр ирсэн. Ингээд халдлага болсон сүмийг зорьж 60 настай эмэгтэйг хутгалж хөнөөгөөд, 55 настай эмэгтэйн толгойг тасдсан. Дараа нь ойролцоох кафе руу зугтсан 44 настай эмэгтэйг мөн хутгалж хөнөөсөн. Тэрхүү эмэгтэй халдлагыг анхааруулж, ойролцоох хүмүүс цагдаад дуудлага өгсөн. Цагдаа нар богино хугацаанд ирж, гэмт этгээдийн буудаж шархдуулсан. Тэр үеэр халдлага үйлдэгч этгээд “Аллах ивээг” гэж хашхирч байсан. Цагдаа нар гэмт хэрэгтнээс Коран судар, хоёр ширхэг гар утас болон халдлага үйлдсэн 30 см урт, 17 см иртэй хутга илрүүлсэн байна. Мөн алан хядагчийн орхисон цүнхийг олсон бөгөөд цүнхэнд халдлагад ашиглагдаагүй өөр хоёр хутга байсан. Сэжигтэн одоогоор хүнд байдалтай эмнэлэгт хэвтэн эмчлүүлж байна” гэж мэдээлсэн юм.
Тунисийн зэвсэгт хүчнийг шүүх шүүхийн төлөөлөгч Мохсен Дали “Халдлага үйлдэгч нь Брахим Ауисауи гэх этгээд байсан. Тэрээр есдүгээр сарын 14-нд завиар эх орноосоо дүрвэсэн. Цагдаагийн байгууллагын бүртгэлээс үзэхэд сэжигтэн этгээд Тунист байх хугацаандаа ямар нэгэн зэвсэгт гэмт хэрэг огт үйлдэж байгаагүй. Тунис улс энэхүү хэрэгтэй холбоотойгоор өөрсдийн мөрдөн шалгах ажиллагааг эхлүүлсэн” гэж мэдээлсэн байна.
Францын нийслэл Парис хотын ойролцоох Конфланс Сейнт-Хонорин хотод энэ сарын 16-ны өдөр Оросын Чечень гаралтай, 18 настай мөн Исламын радикал үзэлт этгээд дунд сургуулийн багш Самуэл Пэтиг орц хэрцгийгээр хөнөөж, толгойг нь тасалсан аймшигт хэрэг гарсан. Уг хэргийн сэдэл нь Францын “Charlie Hebdo” сэтгүүлийн нүүрэнд хэвлэгдсэн зөнч Мухаммедыг доромжилсон өнгө аяс бүхий шог зурагтай холбоотой болохыг цагдаа нар тогтоосон. Учир нь Самуэл Пэти сурагчиддаа үзэл бодлоо чөлөөтэй илэрхийлэх эрхийн талаар хичээл заах үедээ тэрхүү сэтгүүлд хэвлэгдсэн зөнч Мухаммедын нүцгэн зургийг үзүүлсэн байжээ. Францын цагдаагийн байгууллага энэхүү халдлагыг террорист халдлага гэж үзсэн.
Тэгвэл өчигдөр буюу аравдугаар сарын 29-ны өдөр Исламын ариун зөнч Мухаммедын мэндэлсэн өдөр тохиосон. Тиймээс Францын цагдаагийн байгууллага пүрэв гаригт Ницца хотноо болсон халдлагыг мөн өшөө авах зорилготой Исламын террорист халдлага гэж үзэж байгаа аж.
Халдлага болсны дараа Францын Ерөнхий сайд Жан Кастекс улс даяар аюулгүй байдлын зэргийг хамгийн дээд төвшинд хүргэсэн байна. Ницца хотын гол гудамжнуудыг автомат галт зэвсгээр зэвсэглэсэн цагдаа нар хамгаалалтад аваад байгаа аж. Мөн Парис хотноо яаралтай хуралдсан Францын Үндэсний ассамблейн гишүүд халдлагад өртөж амь насаа алдсан хүмүүст нэг минутын турш дуугаа хурааж хүндэтгэл үзүүлсэн байна.
Францын Ерөнхийлөгч Эммэнуэль Макрон тус улсын хэмжээнд аюулгүй байдлын зэргийг дээд төвшинд тогтоосонтой холбогдуулан Исламын шашны мөргөл үйлддэг сүм, хийдүүд болон сургууль зэрэг чухал газруудыг хамгаалах зорилгоор цэргийн хүчийг дайчилна гэж мэдэгджээ. Тэрээр пүрэв гаригт “Бидний үнэт зүйлс, эрх чөлөө, итгэл үнэмшил, ард иргэд, Францын газар нутаг халдлагад өртлөө. Бид террористуудын үйлдэлд ямар ч үндэслэл өгөхгүй гэдгээ маш тодорхой илэрхийлж байна” гэсэн юм.
Харин АНУ-ын Ерөнхийлөгч Доналд Трамп өөрийн твиттер хаягаар дамжуулан Францын ард түмэнд эмгэнэл илэрхийлээд “АНУ энэхүү тулаанд хамгийн хуучны холбоотныхоо талд зогсоно. Исламын радикал үзэлтнүүдийн энэхүү террорист халдлагууд нэн даруй зогсоох ёстой. Зөвхөн Франц төдийгүй дэлхийн аль ч улс үүнийг тэвчиж чадахгүй” гэж мэдэгдсэн байна. Мөн Их Британи, Голланд, Итали, Испани, Турк болон Саудын Арабын эрх баригчид Исламын террорист халдлагыг буруушааж байгаагаа илэрхийлжээ.
Туркийн Ерөнхийлөгч Рэжэп Тайип Эрдоган өнгөрөгч долоо хоногт Францын Ерөнхийлөгч Эммэнуэль Макрон “Charlie Hebdo” сэтгүүл дээрх зөнч Мухаммедын шог зургийг хориглохгүй гэж хэлсний дараагаар, түүний энэхүү байр суурийг маш хүчтэй шүүмжилж, Францын эсрэг бойкот хийхийг ард түмэндээ уриалж байсан юм. Гэхдээ Туркийн Ерөнхийлөгчийн хэвлэлийн төлөөлөгч Фахреттин Алтун пүрэв гаригт Франц улсад хандан терроризм гэх нэр томьёог Исламын шашинтай холбохгүй байхыг анхааруулсан байна. Тэрээр “Бид Францын удирдагчдыг цаашид Исламын шашинтнуудын эсрэг өдөөн турхирсан өнгө аяс бүхий үг, хэллэг ашиглахаас зайлсхийж, энэ удаагийн болон бусад хүчирхийллийн захиалагчдыг олоход анхаарлаа хандуулахыг уриалж байна” гэжээ.
Харин Исламын шашны өлгий болох Саудын Арабын Гадаад хэргийн яам “Ниццэ хотод болсон хэт даврагч үйлдэл нь Ислам төдийгүй бусад бүх шашинтай зөрчилдөж байна. Хүн төрөлхтөн үзэн ядалт, хүчирхийлэл, хэт даврагч үзлийг бий болгож буй бүхий л зан үйлээс зайлсхийх нь чухал” гэж мэдэгдсэн юм.
Тэгвэл Франц дахь Исламын шашинтнуудын зөвлөлийн төлөөлөгч пүрэв гарагт болсон халдлагыг мөн буруушааж, Франц улс дахь Исламын шашны иш бошиглогч Мухаммедын төрсөн өдрийг тэмдэглэх Мавлидын баярыг цуцлахыг уриалсан байна. Франц улс нь Европ тив дэх хамгийн олон Исламын шашинт иргэдтэй орон юм. Гэсэн ч тус улсад сүүлийн жилүүдэд хэд хэдэн том хэмжээний Исламын радикал үзэлтнүүдийн террорист халдлага гарч, олон хүний амь нас хохирсон. Тухайлбал, 2015 онд Парис хотноо террорист этгээдүүд тэсрэх бөмбөг дэлбэлж, гал нээснээр 160 хүний амь насыг хөнөөсөн бол 2016 оны Бастилийн өдөр буюу Францын үндэсний баярын өдөр Ницца хотноо баярын жагсаал руу халдлага үйлдэж 86 хүнийг ачааны автомашинаар мөргөж алсан аймшигтай явдлууд гарч байв.
Эх сурвалж: Reuters
