Улсын онцгой комисс болон Нийслэлийн онцгой комиссын Шуурхай штаб, ХӨСҮТ-ийн багтай хамтарч өчигдөр шөнө ХУД-ийн Энхсаран сувилал орчмын 120 өрхийн 400 гаруй хүнээс шинжилгээ авчээ.
Эрүүл мэндийн яамны өнөөдрийн ээлжит хэвлэлийн хурлын үеэр эмч мэргэжилтнүүд сэтгүүлчдийн тавьсан асуултанд ийнхүү хариу мэдээлэл өглөө.
ТВ5 телевизийн сэтгүүлч: -Өчигдөр ШЕЗ-ийн нэг хүнд халдвар илэрч, тэнд 57 хүн ажиллаж байсныг шинжилгээнд хамруулж 37-г нь тусгаарласан талаар болон өчигдрөөс 119 лавлах ажиллахгүй байгаа гэж иргэдээс гомдол ирсэн энэ талаар тодруулж өгнө үү?
-ШЕЗ-д ажилладаг үйлчлэгчээс 11 дүгээр сарын 28-нд коронавирусний халдвар батлагдсан. Энэ хүн ойрын хавьтлаа нууж хэлэхгүй байсныг бид тандалт явуулсаны үр дүнд ойрын хавьтлуудыг олж тогтоосон. Ойрын хавьтал гэдгийг тухайн батлагдсан тохиолдолтой 24-48 цагийн дотор, максгүй, 1,5 метрээс дотогш зайнд харьцсан хүмүүсийг хэлдэг. Тэгээд ойрын хавьтлын контакт болох түүний ажилладаг ШЕЗ-ийн 2 дугаар давхрын хүмүүсээс шинжилгээ /50 гаруй хүн/ авсан. Улмаар тун ойрын хавьтлын хүмүүсийг тусгаарласан. Хоёрдогч хавьтлын хүмүүсийг гэрийн ажиглалтанд авсан юм. Урьдчилсан байдлаар 37 хүнээс коронавирус илрээгүй. Тэнд манай 2 баг очиж, журмын дагуу ажилласан. Тандалт судалгаа үргэлжлэн явагдаж байгаа. Энд онцлон хэлэхэд, хавьтлын үзүүлэлтээр тусгаарлалт хийдэг, харин ажил, албан тушаалаар үүнийг хийх боломжгүй гэдгийг иргэд ойлгох ёстой. ХӨСҮТ-ийн 119.мн өчигдрөөс эхлээд ажиллаж байгаа. Энд тусгай Ажлын хэсэг ажиллаж байгаа, тэднээс тодорхой мэдээлэл аваарай.
-ХУД-ийн 12 хорооны Биокомбинатад халдварын сэжигтэй тохиолдол гарсан уу?
-ХУД дэх Энхсаран сувилалын орчинд бид урд шөнөжин ажиллаж тусгай ажиллагаа явуулсан. Энэ сувиллын орчинд байгаа хүмүүс, тэнд барилгын ажил хийж байсан хүмүүсийг тандалтад авсан. Энэ орчны газрыг бид дроноор зураг, бичлэг авч тандахад нэг усан сантай, нэг дэлгүүрээр үйлчлүүлдэг, нэг дор байдаг, найз нөхдийн хүрээнд хоорондоо уулздаг, орж гардаг холбоотой хүмүүс байгаа нь уг судалгаагаар гарсан. Ингээд УОК, НОК-ын Шуурхай штабтай бид хамтарч урд шөнө ажиллаж 120 өрхийн 400 гаруй хүнээс шинжилгээг авсан. Яг тэнд амьдардаг өрх айл, хүмүүсийг тусгаарлалтанд аваад байгаа. Халдварыг тархаахгүй урьдчилан сэргийлэх үүднээс бидний хийж байгаа ажлыг иргэд та бүхэн ойлгож, тогтмол маскаа зүүж, зайгаа барьж, ариун цэвэр сахин, дэглэмээ баримтлан дэмжиж байгаад баг хамт олныхоо өмнөөс талархал илэрхийлж байна.
