Хүүхдийн эсрэг хүчирхийллийг бууруулах зорилготой “Худгийн ус түгээгч- Хүнсний дэлгүүрийн худалдагч-Хөрш” хэмээх “Хэрсүү гурвалжин”-гийн хамтын шийдлийн хүрээнд худгийн ус түгээгч нар сайн дурын хүүхэд хамгаалагч боллоо.
Хөдөлмөр, нийгмийн хамгааллын яамнаас хүүхдийн эрхийг хангах, эрсдэлээс урьдчилан сэргийлэх төрийн бодлогыг хэрэгжүүлэх ажлыг нэгдсэн удирдлагаар хангаж, хүүхдийн эрхийг хамгаалах чиглэлээр төр, иргэн, хувийн хэвшлийн санал санаачлагыг дэмжин, гэр бүлийн хүчирхийлэл, хүүхдийн эрхийн зөрчлөөс урьдчилан сэргийлэх “Хэрсүү гурвалжин” хамтын шийдэл нөлөөллийн арга хэмжээг өрнүүлэн, цаашид үндэсний хэмжээнд түгээн дэлгэрүүлэх ажлыг зохион байгуулж байгаа юм.
Дэлхий даяар тархаад буй “COVID-19” халдвараас сэргийлж тусгаарлах болон хөл хорионы арга хэмжээг авч хэрэгжүүлж байгаа энэ үед гэр бүлийн хүчирхийллийн талаар мэдээлэх тоо өсөж, тусламж үйлчилгээний хэрэгцээ нэмэгдсээр байна.
Мөн хүчирхийлэл үйлдэгч нь хүүхэд, эмэгтэйчүүдтэй хамт тусгаарлагдаж, мэдээлэх боломжгүй далд хэлбэрт орж байгаа нь тэдэнд туслах боломжийг багасгаж хаалганы цаадах хүчирхийллийг илрүүлэх боломж хумигдаж байгаа юм.
Иймд гэр бүл, хүүхдийн эсрэг хүчирхийллийг бууруулах, урьдчилан сэргийлэх үйл ажиллагаанд нийгмийн салбар нэгж бүрийг татан оролцуулж хөл хорионы үед тасралтгүй ажиллаж байгаа “Худгийн ус түгээгч – Хүнсний дэлгүүрийн худалдагч – Хөрш” гэсэн хэрсүү гурвалжингийн гурвалсан холбоогоор дамжуулан гудамж, орц, байрныхаа хүүхдүүдийн хөхөрсөн нүд, доголсон хөл, хүнс, хоолны дутагдалтай байгаа зэргийг хэрсүү ажиглан мэдэж мэдээлэх үйл ажиллагааг эрчимжүүлэх ажлын нэг оролцогч нь Ус сувгийн удирдах газрын хамт олон юм.
Ард нийтийн амар тайван байдлыг дэмжин бэлэн байдлын үед Ус сувгийн удирдах газрын 1216 ажилтан Улаанбаатар хотын усны сүлжээний хэвийн байдлыг ханган 673 цэгээс ундны цэвэр усаар ханган ажиллаж байгаа юм. Хүүхдийн эсрэг хүчирхийллээс урьдчилан сэргийлэх, хүүхдийн эрхийг хамгаалахад хүн бүрийн оролцоо чухал бөгөөд энэ өдрөөс эхлэн Худгийн ус түгээгч нар сайн дурын хүүхэд хамгаалагч болж байгаа аж.
Гэр бүл, хүүхэд, залуучуудын хөгжлийн газар, Ус сувгийн удирдах газрын хамт олонд хүүхэд хамгаалал, хүүхдийн аюулгүй байдлын тухай, “Миний гэр аюулгүй орчин” зэрэг 10 төрлийн тараах материал гарын авлагыг лхагва гарагт хүлээлгэн өгсөн байна.
Иргэн Таны орчин тойронд хүчирхийлэл үйлдэгдэх эрсдэлтэй болон үйлдэгдэж байгаа тохиолдолд Та хараагүй мэт, сонсоогүй мэт өнгөрөлгүй Хүүхдийн тусламжийн утас-108, Цагдаагийн 102, 107-д мэдэгдэж хүүхдийн эрх , эрүүл мэнд, аюулгүй байдал, амь насыг хамгаалахад хуулиар хүлээсэн үүргээ биелүүлэхийг ийнхүү ард иргэддээ уриалж байна.
