ио Тинто группийн баруун Австрали дахь төмрийн хүдрийн Брокмен уурхай өнгөрөгч тавдугаар сард тэсэлгээ хийх явцдаа уугуул Аборигенчуудын 46000 жилийн настай эртний түүхийн өвийг устгасан харамсалтай явдал болсон. Үүний дараа компани олон нийтийн зүгээс хүчтэй шүүмжлэлд өртөж, хэд хэдэн удирдах албан тушаалтнуудынхаа цалинг хасах шийдвэр танилцуулсан.
Гэсэн ч Аборигенууд болон Рио Тинтогийн хөрөнгө оруулагчид Австралийн уугуул иргэдийн соёлын өвийг устгасан явдалд тус компанийн удирдлагууд илүү том хариуцлага хүлээх ёстой гэх хүчтэй шахалтыг үзүүлсэн юм. Тиймээс компанийн ТУЗ-өөс өнгөрөгч есдүгээр сард гүйцэтгэх захирал Жан Себастьян Жак болон өөр хоёр удирдах албан тушаалтныг ажлаас нь чөлөөлөх болсноо мэдэгдсэн.
Тэгвэл Рио Тинто групп пүрэв гаригт 2021 оны нэгдүгээр сарын 1-ний өдрөөс эхлэн санхүү хариуцсан захирал Якоб Стаушолмыг өөрсдийн шинэ гүйцэтгэх захирлаар томилж байгаа талаар мэдэгдлээ.
Рио Тинтогийн албан ёсны мэдэгдэлд дурдсанаар Якоб Стаушолм нь 2018 онд тус компанийн санхүү хариуцсан захирлын албан тушаалд томилогдсон бөгөөд өнгөрсөн хугацаанд группийн хэмжээний бизнес үйл ажиллагааны үр дүнд тэргүүлэх үүрэг гүйцэтгэж, хөрөнгийн менежмент, санхүүгийн сахилга бат, тогтвортой байдлыг хангах болон хөрөнгө оруулагч нарт ногдол ашиг хуваарилах ажлуудыг гардаг гүйцэтгэж байжээ. Тэрээр Европ, Латин Америк, Ази, Номхон далайн орнуудад капитал болон үйлчилгээний салбаруудад 25 жилийн турш удирдах албан тушаал хашсан туршлагатай, дэлхийн хэмжээний гүйцэтгэх захирал болох ур чадвартай нэгэн аж.
Якоб Стаушолм нь Рио Тинто дахь карьераа эхлүүлэхээсээ өмнө Данийн үндэстэн дамнасан далайн тээвэр, логистикийн “Maersk” группийн санхүү хариуцсан захирал, стратегийн асуудал хариуцсан мэргэжилтнээр ажиллаж байжээ. Мөн тэрээр Данийн байгууламжийн үйлчилгээ үзүүлэгч “ISS” компанийн санхүү хариуцсан захирал болон Их Британи-Голландын газрын тос олборлогч “Royal Dutch Shell” группийн Ерөнхий дотоод аудиторын албан тушаалыг тус тус хашиж байв.
Ийнхүү Якоб Стаушолм Рио Тинтогийн гүйцэтгэх захирлын албан тушаалд томилогдсоноор түүний оронд тус компанид 27 жилийн турш хүчин зүтгэсэн Питер Каннингэмийг санхүү хариуцсан захирлаар түр томилохоор болсон байна. Харин Рио Тинто группийн өнөөгийн гүйцэтгэх захирал Жан Себастьян Жак 2020 оны арванхоёрдугаар сарын 31-ний өдөр үүрэгт ажлаа хүлээлгэн өгөх аж.
Рио Тинто группийн ТУЗ-ийн дарга Симон Томпсон энэ талаар “Жан Себастьян Жак 2016 оноос хойш Рио Тинтод хүчтэй манлайлал, удирдлага хэрэгжүүлсэн гэдгийг би дахин нэг удаа хэлмээр байна. Тэрээр энэ хугацаанд хувьцаа эзэмшигчдийн ашиг орлого, салбартаа тэргүүлэгч ашигт ажиллагаа, үнэ цэнийг бий болгож, аюулгүй байдлын онцгой гүйцэтгэлийг үзүүлэн, компанийн санхүүгийн нөхцөл байдлыг тун хүчирхэг төвшинд хүргэсэн. Жан Себастьян Жак болон түүний баг компанийн ирээдүйн амжилтад нөлөөлөх маш найдвартай суурийг бий болгож чадлаа” гэсэн юм.
Үүнээс өмнө Рио Тинтогийн гүйцэтгэх захирлын албан тушаалд таван хүний нэрс яригдаж байсан бөгөөд тэдний дунд Рио Тинтогийн Эрчим хүч, ашигт малтмалын бизнес хариуцсан гүйцэтгэх захирал, Монгол Улсын иргэн Б.Болд хүчтэй яригдаж байв.
