Баян-Өлгий аймгийн Мэргэжлийн хяналтын газраас тус аймагт газрын тосны бүтээгдэхүүн импортлогч аж ахуйн нэгжүүдэд өгөгдсөн албан шаардлагын мөрөөр шалгалт хийсэн талаар МХЕГ-аас мэдээлээ.
Уг шалгалтаар Магнай Трейд ХХК-иас хийлгэсэн хувцас тайлах тусгай өрөө болон ариутгалын хөл ванн бэлдсэн ч шаардлага хангахгүй байгаа тул дахин үүрэг даалгавар хүргүүлсэн байна.
Харин “Өлгий Ойл” ХХК нь халдвар хамгааллын хувцас хэрэгслийг өмсөж, тайлах тус тусдаа тусгай өрөө гаргаж, ариутгалын хөл ванн хийлгэж, бүс тогтоож, ангилж, тэмдэг тэмдэглэгээ тавьж биелэлтийг сайн хангуулж байгааг сайшаасан байна.
Энэхүү гүйцэтгэлийн шалгалтын явцад аж ахуйн нэгжүүд ачаа буулгагч ажилчдыг халдвар хамгааллын хувцас тайлж, өмсөх сургалтад хамруулсан юм байна. Мөн эрүүл мэндийн байгууллагуудтай ашигласан халдвар хамгааллын хувцас хэрэгслийг журмын дагуу устгах тухай гэрээ байгуулсан. Түүнчлэн аюулгүй ажиллагааны зааварчилгааг танилцуулж, гарын үсэг зуруулж баталгаажуулсан, бүс тогтоож, ангилж, тэмдэг тэмдэглэгээ тавьж тодорхой чиглэлийн ажлуудыг зохион байгуулаад байгаа аж.
Мэргэжлийн хяналтын газраас газрын тосны бүтээгдэхүүн импортлогч аж ахуйн нэгжүүдэд коронавирусний халдвараас урьдчилан сэргийлэх, халдвар хамгааллын дэглэм сахиулах чиглэлээр 2020 оны 11 дүгээр сарын 30-ны өдөр албан шаардлага өгөгдсөн байна. Үүнд:
- Бараа бүтээгдэхүүнд дагалдаж ирсэн бичиг баримтыг нэг, нэгээр файл уутанд хийсэн байх, ачааг буулгах явцад эрх бүхий мэргэжлийн байгууллагаас зохион явуулсан “COVID-19” халдвараас урьдчилан сэргийлэх, халдвар хамгааллын дэглэмийг чанд баримлах, хамгаалах хувцас өмсөх, тайлах“ сургалтад хамрагдсан ажилтнаар гүйцэтгүүлэх,
- Хувцас тайлах тусгай өрөө болон хувцас тайлсны дараа гутлаа халдваргүйтгэл хийх хөл ваннтай болох,
- Ачаа буулгалтын явцад ажилчдад нэг удаагийн бээлийн гадна барилгын резинэн бээлийг давхар өмсүүлэх,
- Ачааг буулгах ажилтнуудад аюулгүй ажиллагааны зааварчилгаатай танилцсаныг баталгаажуулан гарын үсэг зуруулсан байх
- Ашигласан халдвар хамгааллын хувцас хэрэгслийг журмын дагуу устгах талаар Эрүүл мэндийн байгууллагуудтай гэрээ байгуулан ажиллах гэх мэт шаардлага хүргүүлжээ.
