Уулчид нэгдэн далайн түвшинээс дээш орших дэлхийн хамгийн өндөр уул Эверестээс 8.5 тонн хур хог түүжээ.
Тус ажлыг 39 настай уулчин бүсгүй Марион Чайгне-Дупуй багийнхныхаа хамтаар гардан хийжээ. Тэрээр Эверестийн оргилд гарсан хүмүүсийн үлдээсэн маш их хэмжээний хог хаягдлыг цэвэрлэхэд гар бие оролцсоныхоо төлөө “Ив Роше”-ээс олгодог “Тerre de Femmes” шагналыг хүртсэн юм. Уулчин, байгальд ээлтэй идэвхтэн Марион анх 2016 онд “Цэвэрхэн Эверест” хэмээх төслөө эхлүүлсэн ба 3 жилийн хугацаанд багийнхантайгаа хамтарч 8.5 тонн хог түүссэн нь олны талархлыг хүлээгээд байгаа юм.
Тэрхүү их хэмжээний хогийг өндөр уулнаас хэрхэн буулгасан талаар та гайхаж магадгүй юм. Орон нутгийн иргэд болон удирдлагууд хогийг уулнаас буулгахад зориулж олон сарлаг өгчээ.
Эверестийн оргилд 3 удаа гарсан Марион Эверестийг цэвэрлэж дуусаад дараа нь уг ажлаа Гималайн нуруунд үргэлжлүүлэхийг хүсч байна гэжээ.
Тэрээр “Эверестэд авирах нь хүн ба байгаль хоёрын хамгийн цэвэр харилцаан дээр тулгуурлах ёстой гэж боддог. Гэхдээ 2013 онд оргилд гарахад 30 жилийн экспедицийн улмаас уул маш их хэмжээгээр бохирдсоныг ойлгосон. Тухайн үед зөвхөн оргил цэг дээр бараг 10 тонн хог хаягдал байлаа. Би бага байхаасаа л байгальд хайртай нэгэн байсан учир үүнд маш их их цочирдсон” гэжээ.
Марион 17 гаруй жилийн турш Энэтхэг, Түвдээр аялан уулын хөтөчөөр ажиллаж, амьдарч байсан туршлагатай нэгэн юм. “Цэвэрхэн Эверест” төслөө эхлүүлсний дараа орон нутгийн удирдлагууд төслийг нь дэмжин түүнд хог хаягдлыг уулын энгэрт буулгахад нь туслах 50 сарлаг өгчээ.
Гималайн нурууны хөрсний бохирдол нь Хятад, Энэтхэгийн хөндийд амьдардаг 2 тэрбум орчим хүний ундны усанд сөргөөр нөлөөлдөг тул уулыг цэвэрлэх ажил нь зөвхөн байгалиа хамгаалах гэсэн үг биш, хүн төрөлхтөний амьдралын чанартай салшгүй холбоотой юм.
