Засгийн газрын хуралдаанаар нийслэлд тогтоосон хөл хориог дахин тав хоногоор сунгах шийдвэрийг гаргажээ.
Мэргэжлийн байгууллагуудын хийсэн эрсдлийн үнэлгээгээр дахин 14 хоног сунгах нь зүйтэй гэсэн саналыг УОК, Засгийн газрын хуралдаанаар хэлэлцэн дээрх шийдвэрийг гаргасан байна.
2020 оны 12-р сарын 23-наас эхлэн нийслэлийн хэмжээнд бүх нийтийн бэлэн байдлын зэрэгт шилжсэн. Энэ хугацаа нэгдүгээр сарын 6-ны өдрөөр дуусгавар болж буй бөгөөд дахин тав хоног сунгаснаар нэгдүгээр сарын 11-нийг хүртэл хөл хорио үргэлжлэхээр боллоо.
САР ШИНИЙН БАЯРЫГ ТЭМДЭГЛЭХГҮЙ БАЙХ ШИЙДВЭРИЙГ ГАРГАЛАА
Засгийн газрын хуралдаанаар гаргасан шийдвэрийн талаар Шадар сайд Я.Содбаатар “Мэргэжлийн 11 байгууллагын хамтарч гаргасан эрсдлийн үнэлгээг сонсож, нийслэлийн хэмжээнд тогтоосон бүх нийтийн бэлэн байдлын зэргийг 2021 оны 1-р сарын 11-ний өдрийг хүртэл сунгаж, үүнээс хойш өндөржүүлсэн бэлэн байдлын зэрэгт шилжүүлэн худалдаа, үйлчилгээний салбарыг нээх саналыг гаргалаа. Гэхдээ дахин хөл хорио тогтоосон хугацаанд шинэ голомт гарахгүй бол зэрэглэл бууруулна. Хэрэв дахин голомт гарвал хатуу хөл хориог үргэлжлүүлнэ. Халдварын нөхцөл байдлыг үндэслэн аль болох ард иргэдийн амжиргааг дэмжих тал дээр ажиллана. Бид 3600 иргэнээс хөл хориог сунгах эсэх санал авахад санал асуулгад оролцсон иргэдийн 70 хувь нь сулруулах нь зүйтэй гэсэн.
Бид хөл хориог сунгаж байгаа нь цар тахлыг нийтийн халдвар болгохгүй, голомтыг хумих арга хэмжээг авч байгаа хэрэг. Бид хүн ам багатай газруудад тодорхой аргачлалаар буюу тэг зогсолт хийж, халдварын голомтыг 20-оос дээш хоногт таслан зогсоож байна. Улаанбаатар хот бол 1.7 сая хүнтэй, 412 мянган өрхтэй. Бид голомтыг таслан зогсоох арга хэмжээ авч байгаа боловч, бүх төрлөөр халдвар тархаж байгаа учраас эргэн хатуу хөл хорионд орохгүй байх хугацааг тодорхой хэлэх боломжгүй байна” гэлээ.
Засгийн газрын өнөөдрийн хуралдаанаар сар шинийг баярыг бүх нийтээр тэмдэглэхгүй байх шийдвэрийг гаргажээ.
НӨХЦӨЛ БАЙДЛААС ХАМААРЧ ХАТУУ ХӨЛ ХОРИО СУНГАХ МАГАДЛАЛТАЙ
Засгийн газрын хуралдаанаар шийдвэрлэсэн асуудалтай холбоотой асуултад УОК, Засгийн газрын гишүүд хариулж байна.
-Тав хоног сунгаж байгаа үндэслэл нь юу вэ. Энэ хугацаанд ямар ажлуудыг хийхээр төлөвлөж байна вэ.
-Мэргэжлийн байгууллагууд 14 хоног сунгах санал гаргасан. Бид олон талын нөхцөл байдлыг харгалзан үзэж тав хоногоор сунгахаар болсон. Одоогийн байдлаар голомт тодорхойгүй хоёр тохиолдол байна. Эдгээрийг хумьж авах, БЗД-т 90 мянган иргэнийг хамруулах шийдвэрийн хүрээнд 88,131 иргэнийг хамруулаад байна. Бид өнөөдрөөс эхлээд 7 хоногийн хугацаанд голомтуудыг хянах ажлыг хийнэ. Цар тахлын үед иргэдтэй хамтран ажиллах, иргэдээ сонсох нь чухал. Тиймээс судалгаа, тандалт хийсний үндсэн дээр хэцүү ч гэсэн шийдвэрийг ингэж гаргалаа. Гэхдээ хатуу хөл хориог дахин сунгах магадлалтай.
