УИХ-ын дарга Г.Занданшатар Төв талбайд өлсгөлөн зарлаад гурав хонож буй С.Ганбаатарыг өлсгөлөнгөө зогсоож, УИХ-ын чуулганы хуралдаандаа ирж оролцохыг урилаа.
УИХ-ын гишүүн чуулганы хуралдаанд оролцох ёстой бөгөөд гишүүн нь ард түмний илч төлөөлөгчийн хувьд нийт иргэн, улсын эрх ашгийг тэргүүнд тавьж, Үндсэн хуулийг дээдлэн сахиж, авлигал ашиг сонирхлын зөрчлөөс ангид байхыг тангарагласан гэдгийг санууллаа.
Асуудлыг шийдэх бүрэн эрх нь байхад, иргэдийг төлөөлж сонгогдсон УИХ-ын гишүүн ард иргэдэд буруу ойлголт төрүүлж, жагсаал цуглаанд уруу татаж, эрүүл мэндээ хохироон өлсгөлөн зарлаж болохгүй гэдгийг УИХ-ын чуулганы индэрээс хэлсэн юм.
УИХ-ын дарга Г.Занданшатар “УИХ-ын гишүүн хууль тогтоомжийг хянан шалгах санал гаргаж болно. Хэрэв нэхэмжлэл гаргах шаардлагатай бол энэ талаар тогтоолын төсөл боловсруулан ажиллаж болно. Ард түмний илч төлөөлөгчийн хувьд УИХ-ын чуулганы танхимдаа бид асуудлыг шийдвэрлэх ёстой. Бүрэн эрх нь олгогдсон байхад ард иргэдэд буруу ойлголт төрүүлж, өлсгөлөн зарлаж болохгүй. Үнэхээр нэхэмжлэлийн шаардлага байгаа бол хэлэлцэж шийдвэрлэх ёстой. Оюу толгойн асуудалд У.Хүрэлсүхийн Засгийн газар анхааралтай, өмнөх Засгийн газруудаас илүү сайн ажилласан. Асуудлыг гэрээ хэлцлийн замаар шийддэг. Тиймээс танхимдаа орж ирж, нэгдмэл ажиллах ёстой. Асуудлыг ЗГХЭГ-ын дарга, дэд дарга нар хариуцан ажиллаж байна. Энэ асуудлыг цар тахлын үед улс төржүүлж болохгүй” гэлээ.
