Перу улсад төрийн албаныхан эрх мэдэл, албан тушаалын давуу байдлаа ашиглан коронавирусний эсрэг вакциныг нууцаар, эрүүл мэндийн салбарын ажиллагсдаас урьтаж тариулсан хэрэг илчлэгдсэн байна. 500 орчим хүн энэ хэрэгт нэр холбогдоод байгааг тус улсын шинэ ерөнхийлөгч Франциско Сагасти мэдээлсэн байна. Перу улс нь коронавирусний халдвар хамгийн өндөртэй орнуудын нэгээр нэрлэгдэж байгаа юм. Тус улсад 300 гаруй эмч ковид 19 ээр өвчилж, нас баржээ.
Перу улсад коронавирусний эсрэг вакцинжуулалт өнгөрсөн мягмар гарагт албан ёсоор эхэлсэн байна. Гэхдээ ийнхүү вакцинжуулалт эхлэхээс өмнө тус улсын төрийн өндөр албан тушаалтнууд нууцаар коронавирусний тарилгад хамрагдсан мэдээлэл ил болж, ард иргэд төдийгүй эрүүл мэндийн салбарын ажиллагсдын бухимдлыг төрүүлээд байна.
Цар тахлын эсрэг тэмцлийн тэргүүн фрондод ажиллаж байгаа эмч, сувилагчдаас урьтаж вакцин тариулсан 487 хүн байгаагийн дотор авилгалын хэрэгт холбогдож саяхан албан тушаалаа өгсөн ерөнхийлөгч асан Мартин Вискарра, түүний гэр бүлийнхэн, Гадаад Хэргийн сайд, Эрүүл Мэндийн сайд нар ч багтсан байна.
Үүнтэй холбоотойгоор Перу Улсын Ерөнхийлөгч Франциско Сагасти, Төрийн албаны олон арван албан тушаалтныг оролцуулаад нийт 487 хүн эрх мэдэл, албан тушаалын давуу талаа байдлаа ашиглан коронавирусний эсрэг вакциныг тариулсныг сонсоод гомдол төрч, мөн ихээр бухимдсан гэдгээ миний бие Сайд нарын Зөвлөлийн дарга Виолета Бермудезын хамтаар дахин илэрхийлж байна. Тэдгээр хүмүүс клиникийн туршилтад ашиглах зориулалтын вакцинаас нууцаар тариулжээ.” гэсэн байна.
Перу улс нь коронавирусний халдварын тохиолдлын тоогоороо Латин Америкийн орнуудыг тэргүүлж байгаа юм. Тус улсад 1.2 сая коронавирусний халдварын тохиолдол бүртгэгдэж, 43 мянга гаруй хүн нас барсан байна. Хамгийн харуусалтай нь Перуд 300 гаруй эмч, 120 гаруй сувилагч коронавирусний өвчлөлөөр нас баржээ. Харин халдвар авсан эмч, сувилагчийн тоо 20 мянгыг давсан байна. Ийнхүү Перуд эрүүл мэндийн салбарын ажиллагсад олон зуугаараа коронавирусний халдвар авч байхад тус улсын төрийн өндөр тушаалтнууд вакцин нууцаар тариулж байсан хэрэг илчлэгджээ.
Энэ мэдээлэл цацагдсаны дараа буюу өнөөдөр Перу улсын улс төрийн сөрөг хүчин яаралтай хуралдааныг хийж, хэргийг мөрдөн шалгах хороог байгуулах эсэхийг шийдэхээр төлөвлөж байна. Ташрамд дуулгахад Перу нь Хятадын Синофарм компаниас 300 мянган тун вакциныг худалдан аваад байна. Синофарм компани коронавирусний эсрэг вакциныхаа клиникийн туршилтыг Перуд явуулсан юм. Тус компани өнгөрсөн 9 р сараас хойш 12 мянган сайн дурынхныг туршилтдаа хамруулсан аж.
