АНУ-ын Үндэсний тагнуулын газрын дарга Аврил Хайнс саяхан ОХУ-ын Ерөнхийлөгч Владимир Путин өнгөрөгч арваннэгдүгээр сард болсон АНУ-ын Ерөнхийлөгчийн сонгуулийн үеэр сонгогчдын дунд үл ойлголцол үүсгэхүйц төөрөгдүүлсэн мэдээллүүд цахим орчинд тараах кампанит ажлыг захиалсан. Энэ нь 2016 оны АНУ-ын Ерөнхийлөгчийн сонгуулиар хэрэгжүүлсэнтэй ижил технологийн дагуу явагдсан гэж мэдэгдсэн.
Тэгвэл АНУ-ын Ерөнхийлөгч Жой Байден лхагва гаригт “ABC News” телевизийн алдарт улс төрийн тоймч Жорж Стефанопулостой тусгай ярилцлага хийх үеэрээ ОХУ-ын Ерөнхийлөгч Владимир Путиныг “сүнсгүй алуурчин” гэж тодорхойлсон байна.
-Жорж Стефанопулос: Владимир Путин АНУ-ын Ерөнхийлөгчийн сонгуулийн үеэр Доналд Трампыг дэмжиж, өөрийг чинь гутаах зорилготой үйл ажиллагааг зохион байгуулсан нь манай ард түмнийг хагаралд хүргэсэн. Тэр үүнийхээ төлөө ямар хариуцлага хүлээх ёстой вэ?
-Жой Байден: Тэр үүнийхээ шанг хүртэх болно. Бид саяхан нэлээд удаан утсаар ярьсан. Би түүнийг харьцангуй сайн мэднэ. Ярианы эхэнд би түүнд хандан “Би чамайг мэднэ, чи ч намайг мэднэ. Хэрвээ би чамайг үүнийг хийсэн гэдгийг олж илрүүлбэл бэлтгэлтэй байгаарай гэж хэлсэн.
-Жорж Стефанопулос: Та Владимир Путиныг сүнсгүй гэж хэлсэн юм уу?
-Жой Байден: Тийм ээ. Би түүнд тэгж хэлсэн. Гэхдээ түүний хариу үйлдлээс харахад бид нэг нэгнийхээ хэлэх гэснийг ойлгож чадсан. Би залуу байхдаа тийм ч ухаалаг байгаагүй болохоор үүнийг анзаараагүй байх. Нэг удаа Ерөнхийлөгч асан Жорж Буштай хамт өрөөнд нь байж байтал тэр “Би Владимир Путины нүд рүү нь хараад түүний сүнсийг олж харсан” гэж хэлсэн. Харин би чиний нүдийг хараад ямар ч сүнс олж хараагүй гэдгээ хэлсэн. Хардаа, би гаднын улсын маш олон төрийн тэргүүнтэй уулзаж байсан. Путины хувьд тэр бусдаас өөр хүн.
-Жорж Стефанопулос: Та Владимир Путиныг алуурчин гэж бодож байгаа юм уу?
-Жой Байден: Тийм ээ. Би тэгж боддог.
-Жорж Стефанопулос: Тэгээд тэр ямар хариуцлага хүлээх ёстой вэ?
-Жой Байден: Түүнд хангалттай шанг нь хүртээхийг та мэдээж харах болно. Наймаа хийхдээ амандаа бохь зажлаад байж болохгүй. Бидэнд хамтарч ажиллах нийтлэг ашиг сонирхлууд бий. Тийм ч учраас би Путинтэй хоёр орон стратегийн зэвсгээ харилцан бууруулах яриа хэлэлцээрийг дахин сэргээхээр зэхэж байна. Хэдий тэр ийм зүйлс хийж байгаа ч бид хүн төрөлхтний сайн сайхны төлөө цөмийн зэвсгээс татгалзах ёстой гэжээ.
Ажиглагчид “ABC News” телевиз ярилцлагыг урьдчилан бичлэгээр авч, пүрэв гаригт цацсан бөгөөд ОХУ-ын төрийн тэргүүний талаар болон Кремльтэй үүссэн хурцадмал харилцааг нэлээд хүндрүүлэхүйц яриаг Төрийн департаментаас хянаагүй явдлыг Цагаан ордон болон Жой Байдены зориуд олон нийтэд үзүүлэхийг хүссэн байр суурь гэж дүгнэсэн байна.
Тэгвэл пүрэв гаригт Москвад суугаа АНУ-ын Элчин сайд Анатолий Антоновыг эх оронд нь эгүүлэн татсан байна. Харин ОХУ-ын Гадаад хэргийн яам АНУ-ын Ерөнхийлөгч Жой Байдены эдгээр үгс нь хоёр их гүрний харилцааг эргэлт буцалтгүй доройтууллаа гэж тодорхойлсон юм.
Вашингтон болон Москвагийн харилцаа сүүлийн жилүүдэд Кремийн хойг, Сирийн дайн, газрын тос, ОХУ-ын талаас АНУ-ын сонгуульд хөндлөнгөөс нөлөөлсөн, Оросын сөрөг хүчний тэргүүн Алексей Навалныйг хордуулж алахыг завдсан, улмаар хүний эрхийг нь зөрчиж хорьсон зэрэг асуудлаас үүдэн хурцдах болоод байгаа билээ.
