ОХУ-ын ерөнхийлөгч Владимир Путин АНУ-ын сонгуульд хөндлөнгөөс оролцсоныхоо төлөө өндөр үнэ төлөх болно. Мөн Путиныг алуурчин гэдгийг үгүйсгэхгүй байгаа тухайгаа Жо Байден ярилцлагын үеэр мэдэгдсэн билээ. Тэгвэл Путин Байдены энэхүү мэдэгдэлд хариу өгчээ.
Тэрбээр “Жо Байдены хэлсэнчлэн бид бие биенээ биечлэн мэддэг. Би түүнд юу гэж хариулах вэ гэвэл “Эрүүл энхийг хүсье” гэж хэлмээр байна. Энэ хошигнол биш” гэв.
Түүнчлэн Владимир Путин “Бага байхдаа хамар хашааныхаа нөхөдтэй маргалдахдаа “Хүн бусдыг өөртэйгөө адилхан хэмээн төсөөлдөг” гэж нэг нэгэндээ хэлдэг байсан. Энэ бол хүүхдүүдийн хошигнол биш. Сэтгэлзүйн хувьд маш гүнзгий агуулгатай. Бид бусад хүмүүсээс өөрт байгаа чанаруудаа хамгийн түрүүнд олж хардаг. Тухайн хүнийг өөртэйгөө адилхан гэж боддог. Үүний улмаас тухайн хүнийг өөрийнхөөрөө үнэлж эхэлдэг” гэж хэлжээ.
ОХУ-ын ерөнхийлөгч Владимир Путин ойрын хугацаанд АНУ-ын ерөнхийлөгч Жо Байдентай видео холбоогоор холбогдож нээлттэй мэтгэлцэх хүсэлтэй байгаагаа илэрхийлсэн байна.
