УИХ дахь АН-ын бүлгийн гишүүд Ерөнхийлөгчийн сонгуультай холбоотой нэр бүхий төрийн байгууллагуудын гаргасан шийдвэрүүдийг эсэргүүцэж, Сүхбаатарын талбай дээр өлсгөлөн зарлаад 7 хонож байна.
УИХ дахь АН-ын бүлгийн гишүүд болох Д.Ганбат, О.Цогтгэрэл, А.Адъяасүрэн, Н.Алтанхуяг, Ж.Батсуурь, С.Ганбаатар, Н.Ганибал, Ц.Туваан нарын нэгдсэн өлсгөлөнг өнөөдрөөс зогсоохоор болсныг тэд сая мэдэгдлээ.
Долоо хоног үргэлжилсэн өлсгөлөн болон улс төрийн нөхцөл байдалтай холбогдуулан УИХ эвлэрэн ойлголцох санаачлага гарган, АН-ыг оролцуулсан хамтарсан Ажлын хэсэг байгуулсан юм. Ажлын хэсэг хоёр удаа хуралдсаны үр дүнд ойлголцолд хүрч, өлсгөлөнг зогсоохоор болсныг УИХ-ын дарга Г.Занданшатар, УИХ дахь АН-ын бүлгийн дарга Ц.Ганбат болон хамтарсан Ажлын хэсгийн ахлагч Ц.Мөнх-Оргил нар Сүхбаатарын талбайд ирж мэдэгдлээ.
Тэд дараах 5 асуудлаар ойлголцож, хамтран ажиллахаар болжээ.
1. УБЕГ болон түүний албан хаагчид Улстөрийн намын бүртгэлийн тухай хуулийг зөрчсөн эсэхэд үнэлэлт, дүгнэлт гаргах,
2. УДШ-ийн Тамгын газраас гаргасан АН-тай холбоотой лавлагаа хууль тогтомжийн дагуу гарсан эсэхэд үнэлэлт, дүгнэлт гаргах,
3. СЕХ Ерөнхийлөгчийн сонгуулийн тухай хуулийн хэрэгжилтийг хэрхэн хангаж ажиллаж байгаа талаар УИХ дээр мэдээлэл сонсох,
4. АН болон АН-ын зарим гишүүдээс АТГ-т гаргасан өргөдөл, гомдлын дагуу ямар арга хэмжээ авч байгаа талаар АТГ-ын мэдээллийг УИХ дээр сонсох,
5. УИХ-ын даргын захирамжаар байгуулагдсан Улс төрийн намын тухай хуулийн шинэчилсэн найруулгын төслийг боловсруулах Ажлын хэсэгт АН-тай холбоотой үүсээд байгаа нөхцөлд байдал тухайлбал, тамга тэмдэг бүртгэлтэй холбоотой төрийн байгууллагуудын гаргасан дүгнэлтийг танилцуулах.
