Ерөнхийлөгч онц байдал зарлаж, Ерөнхийлөгчийн сонгуулийг хойшлуулж магадгүй гэх мэдээлэл цацагдаад байгаа. Тэгвэл Ерөнхийлөгч чуулган хуралдаж буй цаг хугацаанд онц байдал зарлах эрхгүй талаар хуульч О.Мөнхсайхан тайлбарлажээ. Тэрбээр “Үндсэн хуулийн дагуу УИХ чуулж буй энэ үед Ерөнхийлөгч онц байдал зарлахгүй, мөн чуулганы чөлөө цагт ч ҮАБЗ-ийн зөвлөмж гарахгүйгээр Ерөнхийлөгч онц байдал зарлахгүй” гэжээ.
Тухайлбал, УИХ-ын чуулган чуулж буй үед онцгой нөхцөл үүсвэл УИХ онц байдал зарлах бөгөөд энэ үед Ерөнхийлөгч онц байдал зарлахгүй талаар Үндсэн хуулийн 25.1.8, 33.1.12-т тодорхой заасан. Мөн Онц байдлын тухай хуулийн 5.1-д “Үндсэн хуулийг 25.2-т заасан онцгой нөхцөл УИХ-ын ээлжит болон ээлжит бус чуулган чуулж байх үед бий болсон бол УИХ онц байдал зарлах тухай асуудлыг Ерөнхийлөгч, Засгийн газар эсхүл УИХ-ын нийт гишүүдийн ¼-ээс доошгүй санаачилгаар хэлэлцэж шийдвэрлэнэ” гэсэн. Харин уг хуулийн 5.3, 5.4-т “Үндсэн хуулийн 25.2-т заасан онцгой нөхцөл УИХ-ын чуулганыц чөлөө цагт бий болсон бөгөөд үйл явцын өрнөлт нь онц байдал нэн даруй зарлахыг шаардаж байгаа хойшлуулшгүй тохиолдолд ҮАБЗ-өөр Ерөнхийлөгч онц байдал зарлах тухай захирамж гаргана”, Ерөнхийлөгч энэ дагуу онц байдал зарласан бол УИХ уул зарлигийг гарсан өдрөөс 7 хоногийн дотор хэлэлцэж батлах эсхүл хүчингүй болгох хуулийн заалттай. УИХ онц байдал тогтоох шаардлагагүй гэж үзвэл уул шийдвэр гарсан өдрөөс эхлэн Ерөнхийлөгчийн зарлиг хүчингүй болно гэж тус тус заасан байна.
