УИХ-д суудалтай улс төрийн нам, эсвлээс 2021 оны Ерөнхийлөгчийн сонгуульд нэр дэвшигчдэд Сонгуулийн ерөнхий хороо өнөөдөр албан ёсоор үнэмлэхийг нь гардуулснаар Ерөнхийлөгчийн сонгуулийн сурталчилгаа эхэлнэ.
Тодруулбал, эрх баригч МАН-ын Ерөнхийлөгчид нэр дэвшигч У.Хүрэлсүх, АН-аас Ерөнхийлөгчид нэр дэвшигч С.Эрдэнэ, “Зөв хүн Электорат” эвслээс Ерөнхийлөгчид нэр дэвшигч Д.Энхбат нар 10.30 цагаас эхлэн үнэмлэхээ гардан авна.
Ерөнхийлөгчийн сонгуульд нэр дэвшигчид хуульд зааснаар 14 хоногийн хугацаанд сурталчилгаа явуулж, өөрсдийн мөрийн хөтөлбөр, бодлого чиглэлээ Монголын ард түмэнд таниулах юм. Ингээд 2021 оны зургадугаар сарын 9-ны өдөр найм дахь удаагийн Монгол Улсын Ерөнхийлөгчийн сонгуулийн санал хураалт болно.
Энэ удаагийн Ерөнхийлөгчийн сонгуульд ялалт байгуулсан эрхэм Монгол Улсын Үндсэн хуульд оруулсан нэмэлт өөрчлөлтийн дагуу зургаан жилийн бүрэн эрхийг эдлэх билээ.
Цар тахалтай хүнд нөхцөл байдалд Ерөнхийлөгчийн сонгуулийн сурталчилгаа, санал хураалт явагдах учраас Засагийн газар, УОК-оос Ерөнхийлөгчийн сонгуулийн үед баримтлах халдвар хамгааллийн дэглэмийн журмыг баталсан юм.
Сонгуулийн сурталчилгааны үед баритмлах ерөнхий журам:
Сонгуулийн сурталчилгааны үед болон нам, эвсэл, нэр дэвшигчийн ухуулах байранд халдвараас сэргийлэх /халдваргүйжүүлэлт, агаар сэлгэлт, чийгтэй цэвэрлэгээг тогтоосон хугацаанд хийх, иргэдийн халууныг хэмжих, ариутгагч бодисоор хангах, хоорондын зай бариулах, санал авах байр сэжигтэй тохиолдлыг түр тусгаарлах өрөөтэй байх гэх мэт/, сэжигтэй тохиолдол илэрсэн үед авах арга хэмжээ, нам, эвсэл, нэр дэвшигчийн эрх, үүргийг журамд нарийвчлан тусгажээ.
Сонгуулийн үед халдвараас урьдчилан сэргийлэхдээ:
– Хүний амь нас, эрүүл мэнд, аюулгүй байдал, нийтийн ашиг сонирхлыг хамгаалах, халдвараас урьдчилан сэргийлэх
– Ил тод, хариуцлагатай байх
– Ялгаварлан гадуурхахгүй, гутаан доромжлохгүй байх
– Байгууллага хоорондын хамтын ажиллагааг хангах
– Хүний нэр төрийг хүндэтгэн харьцах зарчим баримтлана.
Журамд зааснаар сурталчилгааны үед уулзалт, хурал, цуглаан зохион байгуулах байр, танхимыг урьдчилан цэвэрлэж, халдваргүйжүүлэлт хийнэ. Мөн оролцогч бүр амны хаалт заавал зүүж, хүн хоорондын зай 1.5 метрээс доошгүй байх ёстой.
Уулзалт, хурал, цуглаан хийх байр, танхим, гадна талбайд оролцогчдод зориулсан сандал заавал байрлуулах бөгөөд суудал хоорондын зай 1.5 метрээс доошгүй байна.
Иргэдийн биеийн халууныг зайнаас хэмжиж, гарыг нь халдваргүйжүүлэхийг тухайн нам, эвслийн сонгууль эрхэлсэн байгууллагын ажилтан, нэр дэвшигчийн менежер, шадар туслагч хариуцна. Сонгогчидтой хийх уулзалт, хурал, цуглааныг богино цагаар (нэг удаагийн уулзалт, хурал, цуглаан 2 цагаас хэтрэхгүй) зохион байгуулна. Халуунтай, ханиалгах, бөөлжих зэрэг шинж тэмдэгтэй хүнийг эмнэлэгт хандахыг зөвлөж, гэрт нь буцаана.
Сонгогч амны хаалтгүй бол нэг ширхэг амны хаалт өгч болох бөгөөд амны хаалт сурталчилгааны шинжтэй байхыг хориглоно. Сурталчилгааны хэвлэмэл материалыг айл өрхөд тараах бол гэр бүлийн гишүүдтэй харьцахгүйгээр, хаалганы гадна талд үлдээнэ.
