Мьянмарын эрх мэдлээ алдсан удирдагч Аун Сан Су Чи хоёрдугаар сарын 1-нд цэргийн эргэлт гарсны дараа баривчлагдсанаасаа хойш анх удаа өмгөөлөх багтайгаа өнөөдөр уулзлаа гэж түүний өмгөөлөгч нарын нэг нь сэтгүүлчдэд мэдээлжээ.
“Миний бие үргэлж ард түмнийхээ сайн сайхны төлөө залбирч байна. Ардчиллын төлөөх үндэсний лиг намын хувьд иргэдийн төлөө байгуулагдсан учраас хүмүүс байсан цагт оршин тогтносоор байх болно” гэж Су Чи хэлснийг түүний өмгөөлөгч Мин Мин Со уламжилсан байна.
Мин Мин Со өөр дөрвөн өмгөөлөгчийн хамт Су Читэй нийслэл Нейпидо хотын шүүхийн байрны нэгэн өрөөнд уулзсан боловч шүүх хурал болоогүй гэж өмгөөлөгч мэдээлжээ.
Өдгөө 75 настай Су Чи гурав, дөрөвдүгээр сард Нейпидод болсон шүүх хуралд цахимаар оролцсон юм. Түүнийг холбооны хэрэгслүүд хууль бусаар импортолсон, коронавирусний халдварын тархалтыг хяналтад авахын тулд тогтоосон хязгаарлалтуудыг зөрчсөн, нийгмийн эмх замбараагүй байдалд турхирсан мэдээлэл тараасан зэрэгт буруутгажээ.
Мөн Янгон хотын шүүх түүнийг төрийн нууцын тухай хуулийг зөрчсөн хэмээн буруутгаад байгаа юм.
