УИХ-ын чуулганы өнөөдрийн хуралдаан эхэлж байна. Хуралдааны эхэнд УИХ-ын гишүүн Б.Пүрэвдорж хэлэлцэх асуудлын дараалалтай холбоотойгоор үг хэллээ.
Тэрээр “Асуудал нэмэх санал оруулмаар байна. Хуурамч шатахууны эсрэг хуулийг өргөн бариад хэлэлцэх эсэхийг нь шийдвэрлэсэн. Харамсалтай нь энэ хуулийн хэлэлцүүлгийг явуулахгүй байна. Хуурамч шатахууныг хийдэг нөхдүүд өнөөдөр бидний толгой дээр гараад суучихаж. Тэд “МАН-д амаар нь гартал сонгуульд хандив өгчихсөн. Албан тушаалтнуудад бөгсөөр нь гарчихсан авлига өгчихсөн гэж ярьдаг”. Одоо хэрээс хэтэрч байна. Өнөөдөр урд хил дээр 6000 вагон гацчихсан байна. Гэтэл тавдугаар сарын 25-ны өдөр авлига өгдөг хүмүүс 50 вагоныг нэг өдөр оруулж ирж байна. Монголын төрөөс татварын хулгай хийж байгаа, ард иргэдийн машиныг эвддэг хүмүүст хэзээ хариуцлага тооцох юм бэ. Тэд УИХ-ын гишүүнийг бүгдийг нь худалдаад авчихсан гэж ярьдаг юм билээ. Энэ хуулийг даргын зөвлөлөөр хурдан оруул л даа. Хэрвээ оруулахгүй бол би ирэх долоо хоногт жагсаал хийнэ. Ингэж байж үүний ард гарна” гэлээ.
УИХ-ын дарга Г.Занданшатар: Энэ Төсвийн байнгын хорооны хэлэлцэх асуудал байгаа. Төсвийн байнгын хороотойгоо ярилцаад нэг мөр болгоё. Энэ нэлээд удчихсан асуудал шүү.
