Хотын төвөөс Нисэх хүртэл хорьхон минутад давхиад оччихдог байсан цаг саяхан. Гэтэл өнөөдөр Яармаг орчим хот төлөвлөлтийн алдааны сонгодог жишээ болжээ. Ямар ч эмх цэгцгүй, дэд бүтэцгүй, сургууль, цэцэрлэг, үйлдвэрлэл, үйлчилгээ, ажлын байргүй. Гэхдээ баригдаж дууссан, баригдаж байгаа, эзэнтэй, эзэнгүй хэдэн зуун орон сууц, барилга тэнд боссоор байна. Яармаг, Буянт-Ухаад оршин суугчид ажил, сургуульдаа ирж очих гэж хотын төв рүү бөглөрөөстэй. Орой нь гэртээ харих гэж “таглараастай”. Зай чиггүй барьсан олон барилгын уршгаар хэдхэн жилийн өмнө хөдөө шиг сэлүүхэн байсан газар өнөөдөр түгжрэлийн “их хөндий” болчихлоо.
Жишээ татъя. Хан-Уул дүүргийн 16-р хороо буюу Буянт-Ухаа хороололд амьдардаг иргэн хотын төвд ажилтай. Өглөө 9 цагаас ажилдаа амжихын тунд 7 цаг 20 минутад гэрээсээ гардаг. Гэвч түгжрэлгүй үед аравхан минут зарцуулаад очдог Яармагийн гүүрт хүрэхийн тулд одоо 1-2 цаг түгжирдэг болсон. Тийм болохоор бүтэн хоёр цагийг түгжрэлд өнгөрөөгөөд ч ажилдаа ирж амжихгүй хоцрох тохиолдол олон. Нисэх, Яармагт оршин суугч өдөрт дунджаар 3 цагийг түгжрэлд өнгөрөөдөг гэж үзвэл жилд дунджаар 45 өдрийг түгжрэлд алдаж байна гэсэн үг юм.
УИХ-аас баталсан Улаанбаатар хотыг 2020 он хүртэл хөгжүүлэх ерөнхий төлөвлөгөө, 2030 оны хөгжлийн ерөнхий чиг хандлагын баримт бичигт Улаанбаатар хотыг 8 дэд төвтэй болгон хөгжүүлэхээр заасан. Мөн “Улаанбаатар хотыг нэг төвт хотоос олон төвт хот болгон хөгжүүлж, улмаар хөгжил дагуулсан бүтээн байгуулалтыг эхлүүлнэ” гэж тусгаж байжээ. Энэ төлөвлөгөөний хүрээнд Хан-Уул дүүргийн Нисэх, Яармаг орчмын орон сууцны хороолол, Биокомбинат, Туул-Шувуун фабрик орчмын ерөнхий төлөвлөгөөг хэлэлцэн баталсан. Гэвч хотын төлөвлөлт нэртэй гоё зураг цаасан дээр л үлддэг гэдгийн сонгодог жишээ Яармаг болсон. Хотын дарга Д.Сумъяабазар Яармаг орчмын нэгдсэн төлөвлөлт дээр том алдаа гарсан гэдгийг хүлээн зөвшөөрлөө. Тэрээр цахим хуудастаа “Шинэ хотын төв гэж олон жил хадгалж байсан газраа буруу төлөвлөж, эмх цэгцгүй болгосон. Тухайн үед хариуцаж байсан дарга нарын зах хязгааргүй шуналаас болж Яармаг орчим одоо толгойны өвчин болж байна” гэжээ.
