Эрчим хүчний яамнаас сайжруулсан шахмал түлшний нийлүүлэлт болон борлуулалтын цэгийн талаар мэдээлэл хийлээ.
Эрчим хүчний сайд Н.Тавинбэх: Сүүлийн үед сайжруулсан шахмал түлшний хангамж дээр доголдол гарч, иргэдэд хүндрэл учруулж байгаа учраас мэдээлэл өгч байна. Өнөөдрийн байдлаар нийслэлийн хэмжээнд 74 мянган тонн сайжруулсан шахмал түлшний нөөцтэй байна. Нийслэлийн хэмжээнд сараасаа хамаараад 50-110 мянган тонн сайжруулсан шахмал түлш хэрэглэдэг.
Өөрөөр хэлбэл, бага ачаалалтай сард бол бүрэн хангахаар, өндөр ачаалалтай сарын хэрэглээг бол 70 орчим хувьтай хангахаар нөөцийг зуны бага ачааллын үед бүрдүүлсэн. Сүүлийн үед дараалал, хомсдол үүсч байгаа шалтгаан нь борлуулалтын цэгийн тоо цөөрсөнтэй холбоотой гарсан. Бид борлуулалтын цэгийг тухайн сард, өнгөрсөн оны мөн үед ямар хэмжээний сайжруулсан шахмал түлшийг борлуулж байсантай харьцуулж нэмэх үү, бууруулах уу гэдгээ шийддэг.
Энэ жилийн хувьд хэрэглээ нэлээд өсч байна.
Нэгд, төрөөс төлбөрийг 50 хувь хөнгөлсөнтэй холбоотойгоор хэрэглээ өсч байна. Хоёрт, аравдугаар сар гаргаад цаг агаар нэлээд хүйтэрч байна. Үүнтэй холбоотойгоор хэрэглээ өссөн.
Ний нуугүй хэлэхэд, зарим айл өрхөд шахмал түлш олгох картыг давхардуулж олгосонтой холбоотойгоор хэрэглээ өссөн байна. Өнгөрсөн оны мөн үед өдөрт 1700-2000 тонныг хэрэглэж байсан.
Өнөөдрийн байдлаар өдрийн хэрэглээ 3200 тоннд хүрсэн байна. Энэ хэрэглээнээс болж цэгийн тоо цөөдөж, хэрэглэгчдэд дараарал үүсч хүндрэл гарсан байна.
Тиймээс өнөөдрөөс эхлээд цэгийн тоог 100-аар нэмэгдүүлэхээр боллоо. Өнөөдрийн байдлаар 280 цэг ажиллаж байгаа бол маргаашаас 380 цэгээр дамжуулан түлшний борлуулалтын цэгээ нэмнэ. Цаашдаа цэгийн тоогоо нэмээд явна.
Жишээ нь, арваннэгдүгээр сарын 1 гэхэд борлуулалтын цэгийн тоог 600 болгоно. Ер нь бүх л юманд оочер дугаар байдаг ш дээ. Гол нь хэм хэмжээгээ алдахгүй л байх ёстой. Сая гарсан гол хүндрэл нь иргэд оочерлоод очиход зарим цэгийн түлш дуусан байсан. Одоо цэгээ нэмэхээр нэг цэг дээр үйлчлүүлэх хэрэглэгчийн тоо цөөрнө.
Засгийн газрын тогтоолын дагуу шахмал түлшний үнийг 50 хувиар хөнгөлсөн байгаа. Халаалтын улирал дуустал буюу 2022 оны дөрөвдүгээр сарын 1 хүртэл үргэлжилнэ. Иргэд сайжруулсан шахмал түлшний үнэ арванхоёрдугаар сарын 31-нээр энэ хөнгөлөлт дуусна гэж ойлгоод зохиомол хэрэглээг бий болгоод байна. Тиймээс санаа зоволтгүйгээр хөнгөлөлтөө эдлээрэй гэж хэлмээр байна.
