Улс төрд нөлөө бүхий зарим хүмүүс болон тэдний хамаарал бүхий компаниуд Хөгжлийн банк /ХБ/-наас зээл аваад эргүүлж төлөөгүй, зориулалтын бусаар ашигласан зэрэг асуудал олны анхааралд ороод байна.
Тухайлбал, Хөгжлийн банкны нийт зээлийн 55,3 хувь нь буюу 1,7 их наяд төгрөг “чанаргүй зээл”-ийн ангилалд орсон байгаа юм. Иймд УИХ-ын гишүүн асан А.Сүхбатын төрсөн дүү А.Баттөгсийн эхнэрийн нэр дээр бүртгэлтэй “Түгээмэл түмэн хшиг” компани, Газ-Импорт ХХК-ийн зээлтэй холбогдуулж Хөгжлийн банкны дэд захирал Ч.Энхбатыг холбогдуулж АТГ-аас шалгаж байгаа талаар бид өмнө мэдээлсэн. Мөн Алтай Констракшны эзэн Х.Бат-Эрдэнийн үүсгэн байгуулсан “Монгол драй милк” компанийг ч шалгаж эхэлсэн байгаа юм.
–“ХБ–НЫ БАРЬЦААНД ТАВЬСАН НООЛУУР НЬ АЛГА БОЛСОН” ГЭХ КЬЮ ЭС СИ ХХК БОЛОН ЭРЭЛ, ХӨТӨЛ ЗЭРЭГ ХХК–УУДЫГ АТГ, ЭЦГ–ААС ШАЛГАЖ МАГАДГҮЙ–
Харин Ерөнхий сайд Л.Оюун-Эрдэнэ өнгөрөгч Даваа гараг /2022.02.14/-т мэдээлэл хийх үеэрээ, “Хөгжлийн банк байгуулагдсан 2011 оноос хойш бүх хэргүүдийг Эрүүгийн хуулийн дагуу мөнгө угаах гэмт хэргээр шалгаж өгөх хүсэлтийг Ерөнхий прокурорт гаргасан” гэж мэдэгдсэн. Тэгвэл “Хөгжлийн банкны зээлийн асуудлаар” АТГ, Эрүүгийн цагдаагийн алба хамтран зарим мөрдөн шалгах ажиллагааг явуулж байгаа гэх мэдээлэл байна.
Тодруулбал;
- 2014 онд Хөгжлийн банкны гүйцэтгэх захирлаар Н.Мөнхбат, Төлөөлөн Удирдах зөвлөл /ТУЗ/-ийн даргаар Б.Шинэбаяр нарыг ажиллаж байх үеэд Кью Эс Си ХХК “33.4 км төмөр зам барих ажилд шаардагдах санхүүжилт” нэрийдлээр 71,3 сая ам.долларын зээлийг Хөгжлийн банкнаас авчээ. Харин өдгөө 200 орчим тэрбум төгрөгийн зөрчил үүсээд байгаа аж. Кью Эс Си ХХК компанийг “Куалитистийл Корпорэйшн” гэх компани 100 хувь эзэмшдэг бөгөөд “Куалитистийл Корпорэйшн”-г Британийн виржини арлууд бүртгэлтэй Quality Steel Corp эзэмшдэг гэж УБЕГ-т бүртгүүлсэн байна.
Харин өөр эх сурвалжууд, “Кью Эс Си” ХХК-ийн 10 хувийг ХХБ-ны хувь нийлүүлэгчтэй нэгдмэл сонирхолтой Д.Эрдэнэбилэгийн хамаарал бүхий МИК-ийн ТУЗ-ийн дарга асан М.Мөнхбаатар, ЗТЯ-ны сайд асан Д.Ганбатын хүү Г.Хүрэлбаатар 30 хувийг, ТиДиБиСекьюритис 30 хувь, Хөгжлийн банкны ажилтан байсан А.Бат-Оргил 30 хувийнэзэмшигчид байсан байж болзошгүй гэж мэдээлж байгаа юм. Хачирхалтай нь “Кью Эс Си” ХХК барилга, машин механизм, төмрийн хүдэр, төмрийн хүдрийн баяжмал зэргийг зээлийн барьцаанд тавьжээ. Мөн “агуулахын түүхий ноолуурыг барьцаалсан нь байхгүй болсон” гэх мэдээлэл ч байгаа юм. Энэ бүх асуудлыг АТГ-аас шалгаж байгаа ажээ.
- Мөн Хөгжлийн банкны гүйцэтгэх захирлаар Н.Мөнхбат, Төлөөлөн Удирдах зөвлөл /ТУЗ/-ийн даргаар Б.Шинэбаяр нарыг ажиллаж байх үеэд Эрэл ХХК “Угсармал орон сууц” нэрийлдээр 2013 онд 23 сая ам.доллар, 2014 онд 12,1 сая еврогийн зээл авчээ. Харин өдгөө 150 гаруй төгрөгийн зөрчил үүсээд байгаа аж. Эрэл ХХК-ийг Д.Сэргэлэн 100 хувь эзэмшдэг бол, гүйцэтгэх захирал нь УИХ-ын гишүүн асан Б.Эрдэнэбатын хүү Б.Жаргалан ажилладаг байна. Хачирхалтай нь, тус зээлийг Засгийн газрын 3 дугаар тогтоолоор олгосон бол, Төслийн тоног төхөөрөмжийг хэт өндөр үнээр авсан байжээ. Үүнийг АТГ-аас шалгаж байж магадгүй байна.
- 2012 онд ХБ-ны гүйцэтгэх захирлаар Ким Жанг Жин, ТУЗ-ын даргаар Б.Батбаяр нар ажиллаж байх үед Хөтөл ХХК 61,2 сая ам.долларын зээл авчээ. Харин өдгөө 200 гаруй тэрбум төгрөгийн зөрчил үүсээд байгаа аж. Иймд тус асуудлыг АТГ-аас шалгаж эхэлжээ.
