Хөвсгөл нуурын байгалийн цогцолборт газарт баригдах 37.9 километр хатуу хучилттай авто зам, барилгын ажил гүйцэтгэх гэрээг БОАЖЯ хүлээлцсэн тухай мэдээлж байв. Ингэснээр Хатгал- Жанхай -Тойлогт чиглэлийн хатуу хучилттай авто зам, зогсоол барих болон тохижилтын ажлуудыг гэрээнд тусгасны дагуу 2022-2023 онд бүрэн гүйцэтгэхээр болсон юм.
Уг бүтээн байгуулалтын ажил эхэлжээ. Энэ талаар УИХ-ын гишүүн Л.Энх-Амгалан “Азийн Хөгжлийн Банкны тогтвортой аялал жуулчлалыг дэмжих хөтөлбөрийн хүрээнд Хөвсгөл нуурын баруун эрэг Жанхайн даваа-Тойлогт хүртэлх 38 километр хатуу хучилттай авто замын ажил нээлтээ хийж, албан ёсоор эхэлж байна.
Зун цагт Жанхайн даваа хүртэл зам тун чанга. Шороон замын хоёр талын ой битүү саарал өнгөтэй. Нуурын замагжилт асар их тоосжилтоос үүдэлтэй гэдгийг эрдэмтэд тогтоосон. Зам баригдсанаар Хөвсгөл нуур, нуур орчмын байгаль орчны энэ бүх асуудал шийдэгдэх болж байна” хэмээн мэдээллээ.
