УИХ-ын Эдийн засгийн байнгын хорооны хуралдаанаар Хөшигийн хөндийд эдийн засгийн чөлөөт бүс байгуулах тухай тогтоолын төслийг хэлэлцлээ.
Энэ үеэр Хөшигийн хөндийд нисэх буудал барих, цаашлаад хот байгуулахыг мэдсэн хүмүүс газар авч, одоо нөхөн төлбөр нэхэж байгаа тухай шүүмжлэл өрнөлөө. Ялангуяа Дамбын Хишигжаргал гэдгээрээ олон нийтэд танигдсан бизнесмэн 500 га газар авчээ. УИХ-ын гишүүд түүнээс газрыг нь улсын мэдэлд авах хэрэгтэй гэдгийг анхааруулж байлаа.
Б.ЭНХБАЯР: -Дамбын Хишигээ гэж нөхөр Хөшигийн хөндийд том газар авсан. Энэ хүн одоо газраа улсад шахаж байгаа гэж ойлгосон. Улсын төвөөс энэ нөхөрт мөнгө өгөх юм уу. Хэчнээн га газар авчихаад хэдэн төгрөгөөр улсад улсад зарах гээд байгаа юм бэ. Төрийн газрыг буцаагаад төрд нь шахаж болохгүй.
Д.ОЮУНХОРОЛ (Хөшигийн хөндийн бүтээн босголтын асуудал хариуцсан Засгийн газрын бүрэн эрхт төлөөлөгч): -Нийт 31 мянган га газрыг улсын тусгай хэрэгцээнд авсан. Үүн дээр Дамбын Хишигжаргалын 500 га газар бий. 41 хэсэгт авсан газар нь нийлээд 500 га юм билээ. Гурван шатны шүүхийн шийдвэр Д.Хишигжаргалын талд гарсан байдаг. Бидэндтэй уулзаж асуудлаа танилцуулсан. Засгийн газраас баталсан ерөнхий төлөвлөгөөтэй үйл ажиллагаагаа уялдуулж ажиллана гэсэн саналаа илэрхийлсэн. Залуучуудын хот байгуулахад оролцох боломжтой гээд боломжийн төсөл боловсруулчихсан юм билээ.
Д.БАТЛУТ: -500 га газар авчихаад зориулалтын дагуу хоёр жил ашиглаагүй бол буцааж хураах хуулийн зохицуулалттай шүү дээ.
Хуульд нийцүүлэх үйл ажиллагаа явуулж болох боломж харагдаад байна. Газар аваад түүнийгээ буцаагаад төрд зардаг бизнес бий болгочихсон байна шүү дээ. Тэндээ байшин барьсан юм уу, хашаа хатгасан юм уу. Үгүй бол хураах хэрэгтэй
