Боловсрол телевизийн уран бүтээлчид “Endemol Shine” группийн албан ёсны эрхтэйгээр “Яг түүн шиг” шоу нэвтрүүлгийг тав дахь жилдээ үзэгчдийн хүртээл болгох гэж байна.
Дэлхий даяар тархсан цар тахлын улмаас урлагийн салбарын үйл ажиллагаа түр завсардаж, “Яг түүн шиг” шоу ч хоёр жил зохиогдоогүй юм.
Харин тун удахгүй Боловсрол телевизийн уран бүтээлчид 15 жилийн ойдоо зориулан шинэлэг дүр төрх, содон үзүүлбэрүүдээр дүүрэн “Яг түүн шиг” шоугаа толилуулахад бэлэн болжээ.
Тус нэвтрүүлгийн нэгдүгээр улирлын ялагчаар дуучин П.Баярцэнгэл, 2-р улиралд жүжигчин Т.Бархүү, 3-р улиралд дуучин Б.Нацагдорж, 2019 онд өмнөх 3 улирлын шилдэг найман оролцогч өрсөлдсөн “Яг түүн шиг-4” шоуны ялагчаар жүжигчин Т.Бархүү тодорч байсан билээ.
Тэгвэл тав дахь жилдээ зохиогдож буй “Яг түүн шиг” шоу нэвтрүүлгийн баг бүрэлдэхүүн оролцогчдоо бүрдүүлж дууссан бөгөөд тун удахгүй үзэгчдэдээ танилцуулах юм.
Ням гараг бүрийн үдэш та биднийг гайхшруулах найман оролцогч хэн байх бол?
