Засгийн газрын ээлжит хуралдаанаар Хөтөлийн цемент, шохойн үйлдвэрийг хувьчилсан шийдвэрийг хүчингүй болгож, Л.Наранбаатарыг Хөтөлийн цемент, шохойн үйлдвэрийн захирлын түр орлон гүйцэтгэгчийг томилсон билээ. Тэгвэл Л.Наранбаатар Хөтөлийн цемент, шохойн үйлдвэрийг хүлээн авах үед нөхцөл байдал ямар байсныг өөрийн цахим хуудаснаа бичжээ.
Тэрээр “Хөтөлийг хүлээж авах үед Д.Эрдэнэбилэгийн талынхан зуухаа унтрааж, тээрмийн хөдөлгүүр асаадаг “Давтамж хувиргуур” (ДХ) -аа эвдэж өгсөн. Ер нь хорлочихож байгаа юм.
Давтамж хувиргуурын үүрэг нь хөдөлгүүрийг зөөлөн эргүүлж, аажмаар зохих хурданд нь хүргэдэг гол хэрэгсэл. ДХ-гүй бол тээрмийн хөдөлгүүр шууд огцом эргэж асна. Огцом эргэлтээс хөдөлгүүрийн араа, шүд хүчтэй хавиралтанд орж элэгдэх, цуурах, бусад төхөөрөмждөө нөлөөлдөг аюултай.
ДХ-г улс даяар хайсан, Эрдэнэт, ОТ агуулахад аюулгүйн нөөцөнд бол байна. Эрдэнэтээс гуйсан, тэд ч бас аюулгүй байдлаа бодох нь ойлгомжтой, өгөөгүй. Эрдэнэт зогсвол мэдээж юун Цементийн үйлдвэр… Д.Эрдэнэбилэг Хөгжлийн банкнаас авсан тэр олон зуун тэрбум төгрөгөөрөө Цементийн үйлдвэрийн хэсэгт нэг ч төгрөгийн хөрөнгө оруулалт хийгээгүйг энд ажиллаж байж мэдлээ.
ДХ байхгүйгээс 84-оноос шинэчлэлт хийгдээгүй хуучирсан, Орос тоног төхөөрөмжтэй Цементийн үйлдвэрт байнга доголдол гарч, 3 тээрмээс 1-2 нь үлгэн салган ажиллаж байна. Энергетик маань сайн, засварчид, инженерүүд маань сайн тулдаа л торгоож асааж байна.
ДХ гаднаас 40 хоногийн өмнө захиад хил, гаалийн хүндрэлээс таг. Одоо онгоцоор авч ирэх сонголт уруу орлоо. Зардал өснө. Гэвч үйлдвэр 2 хоног зогсоход манай ажилчдын сарын цалин (1тэрбум орчим.₮) -тай тэнцэх хэмжээний мөнгө алга болно. Цемент тасрах эрсдэлд орно. Шууд захиалахаар хардалт, сэрдэлт, АТГ шорон гэх мэт нь хажууд, шууд захиалахгүй гэхээр үйлдвэр, ажилчид, цементийн тасалдлаас үүссэн нийгмийн бухимдал хажууд…
Намайг, манай хамт олныг хожим яллавал яллаг, ашиг сонирхолын зөрчилгүй учир үнэн тэр үед шүүгдэнэ, шууд захиаллаа… Үйлдвэр, ажилчид, цемент чухал… Онцгой байдал гэж байдаг бол Хөтөл дээр л онцгой байдал зарламаар… Байдал хэдий хүнд байгаа ч өнөө өглөөний мэдээгээр өмнөх сарын үйлдвэрлэлтэй адил буюу 45,000 тн цемент үйлдвэрлэн борлуулсан гэгээтэй мэдээтэй. Зүтгэнэ дээ…” гэжээ.
