Коронавирусийн эсрэг вакцин худалдаж авахдаа авлига авсан хэргээр Киргизстан улсын эрүүл мэндийн сайдыг өчигдөр баривчилжээ.
Баривчлагдсан сайд Алымкадыр Бейшеналиев нь коронавирусийн халдварын эмчилгээнд “халуун цэцэг” (aconite) гэгддэг хортой ургамлын үндсийг буцалгаж уувал үр дүнтэйг нээж, уг аргыг улсын эмнэлгүүдэд нэвтрүүлж байсан нэгэн юм.
Бейшеналиев улсын хэрэгцээнд хоёр сая гаруй тун вакцин худалдаж авахдаа төлбөрийг нь “оффшор дансанд шилжүүлсэн” асуудлаар баривчлагдсаныг Киргизстаны прокурорын газар мэдээлсэн байна.
Тэрбээр эрх мэдлээ ашиглан 1.5 тэрбум сом ($19 сая) шилжүүлснийг шалгаж тогтоосон юм байна. Уг хэргээс өмнө Бейшеналиевын суудал ганхаж эхлээд байжээ. Тухайлбал өнгөрсөн сард дэд сайд нар нь түүнийг огцрохыг шаардаж, доод албан тушаалтнуудаа дарамталдаг, бэлгийн харилцаанд ордог зэрэг баримтуудыг дэлгэж байв.
Бейшеналиев нь Киргизийн ерөнхийлөгч Садыр Жапаровын ойрын холбоотон юм. Баривчлагдахын өмнөх өдөр сайд, ерөнхийлөгч хоёр олон нийтийн арга хэмжээнд цуг оролцож байжээ.
Эндээс Киргизийн улс төрийн хүрээнд зөрчил тэмцэл үргэлжилж байгааг харж болохоор байна.
30 жилийн өмнө Зөвлөлт Холбоот Улсыг задарсны дараа тусгаар тогтносон Киргизстан улс гурван ерөнхийлөгчөө бослого тэмцлийн үр дүнд албан тушаалаас нь зайлуулж байсан юм.
Одоогийн ерөнхийлөгч 53 настай Жапаров 2020 оны сонгуулийн дараа гарсан бослого үймээний үеэр шоронгоос суллагдаж байжээ.
Эх сурвалж: AFP
