Хан-Уул дүүргийн 19 дүгээр хорооны нутаг дэвсгэрт өчигдөр могой орж ирсэн талаарх дуудлага бүртгэгдсэн байна. Энэ талаар Нийслэлийн Байгаль Орчны Газар (НБОГ)-ын мэргэжилтэн Б.Тэнгисээс тодруулахад “Орон нутгийн замд зорчсон тээврээр дамжиж, могой орж ирсэн байх магадлалтай хэмээн үзэж байгаа. Могой суурьшлын бүсэд орж ирсэн талаарх дуудлага, мэдээлэл зургаадугаар сард цөөн бүртгэгддэг. Өнгөрсөн жилүүдийн зургаадугаар сард цөөн дуудлага ирж байсан. Одоогоор нийслэлийн хэмжээнд нэг л дуудлага байна” гэдгийг хэллээ.
- 2018 онд 7
- 2019 онд 14
- 2020 онд 35
- 2021 онд 51 дуудлага бүртгэгдсэн байна.
Мөн тэрбээр үргэлжлүүлэн “Бороо орсны дараа могойн идэвхжил өндөр болдог. Өөрөөр хэлбэл, чийгтэй дулаан орчин бүрдэх үед могой идэвхтэй болдог. Түүнчлэн үржлийн үед буюу наймдугаар сард түгээмэл тохиолдоно.
Өнгөрсөн онд нийт 51 дуудлагыг хүлээн авсан гэдгийг дээр дурдсан. Үүний ихэнх дуудлага нь наймдугаар сар, есдүгээр сард бүртгэгджээ. Сонгинохайрхан, Хан-Уул дүүргийн нутаг дэвсгэр, зуслангийн бүсэд түгээмэл бүртгэгдсэн байна. Ерөнхийдөө ихэнх дуудлага наймдугаар сард ирдэг гэсэн үг. Дуудлага мэдээллийг дагуу НБОГ-аас хамгийн дээд талын хугацаа нь 72 цагийн дотор шийдвэрлэх заалттай байдаг. Бид дуудлага хүлээн авч, могойг ногоон бүсэд буюу иргэдэд аюулгүй газарт тавьдаг” гэв.
