Улаанбаатар хот орчимд бамбай хоншоорт, рашааны гэх хоёр зүйлийн могой тархсан байдаг.
Бамбай хоншоорт могой нь хортой могойн төрөлд багтах бөгөөд биеийн ерөнхий зүс их төлөв хул шарга юм уу хар хүрэн, нуруу ба сүүлний дагуу хөндлөн цагаан судалтай, сүүл богино бөгөөд хүүхэн хараа нь босоо, нүд хамрын сүвний хооронд гүнзгий хонхортой тул зэрвэс ажиглахад хамрын дөрвөн сүвтэй мэт байдгаараа бусад могойноос хялбар ялгагдана.
Могой нь хот орчим хүүхдийн тоглоомын талбай, ногоон байгууламж, айлын хашаа, орон сууц, аж ахуй нэгж байгууллагын авто зогсоол, автомашины грашаас олдох нь их байдаг аж. Улаанбаатар хотод өнгөрсөн жил 58 удаагийн дуудлагаар могой гаргаж, аюулгүй болгожээ.
Иргэдийн дуудлагын дагуу Нийслэлийн байгаль орчны газрын мэргэжилтэн өнөөдөр хотын төвд Циркийн орчимд машины эд ангид орооцолдсон бамбай хоншоорт могойг гаргаж, аюулгүй болгожээ. Энэ нь дулаарснаас хойш тус байгууллагад ирсэн могой гарсан гурав дахь удаагийн дуудлага юм байна.
Хур бороо ихтэй үед үерийн усаар дамжих, мөн идэш тэжээл хайн хотын захын хэсгээр могой орж ирж байгаа бол хотын төв хэсэгт хөдөө орон нутагт аялж яваад ирсэн иргэдийн авто машины моторын хэсэгт, ачаа тээшинд тээвэрлэгдэн ирсэн байх магадлал өндөр байх тул иргэд сонор сэрэмжтэй байхыг анхааруулж байна.
Дулааны улирал эхэлсэнтэй холбоотойгоор суурьшлын бүсэд могой орж ирлээ гэсэн дуудлага ирж байна. Хэрэв могой харсан тохиолдолд:
-
Ажлын цагаар нийслэлийн Байгаль орчны газрын 72720303
-
Ажлын бус цагаар нийслэлийн Шуурхай удирдлага зохицуулалтын төвийн 11-310005дугаарын утсаар яаралтай мэдээлэл өгнө үү.
Дуудлага өгөөд мэргэжлийн хүмүүс иртэл могойн байршлыг сайтар харж байх, хэрэв хатгуулсан тохиолдолд яаралтай эмнэлгийн байгууллагад хандахыг Нийслэлийн байгаль орчны газраас зөвлөв.
