ОХУ сүүлийн зуун жилд анх удаагаа гадаад өрийн төлбөрөө хугацаанд нь төлж барагдуулалгүй, дефолт зарласныг барууны хэвлэлүүд онцолжээ. Тодруулбал, ОХУ-ын эрх баригчид өнгөрсөн ням гариг буюу зургадугаар сарын 27-ны өдөр төлөх хуваарьтай байсан евро бондын хүүгийн 100 орчим сая ам.долларын төлбөрийг хөнгөлсөн хугацаанд барагдуулж чадаагүй бөгөөд энэ 1918 оноос хойш анх удаа гадаад зээлдүүлэгчдийнхээ өмнө дефолт зарласан явдал болжээ.
ОХУ гадаад зээлийн өр төлбөрөө хугацаанд төлж чадахгүйд хүрсэн нь барууны орнууд хориг арга хэмжээгээ чангаруулж, ам.доллар болон еврогийн гүйлгээнд хязгаарлалтууд хийж эхэлсэнтэй холбон тайлбарлаж байна. Өнгөрсөн гуравдугаар сараас ОХУ-ын евро бондуудын эргэн төлөлт асуудалтай болсон. ОХУ тавдугар сарын 27-нд эргэн төлөлт хийх хуваарьтай евро бондын хүүгийн төлбөрийг дайны нөхцөл байдал, санхүүгийн хоригоос болж төлөх хугацааг сараар сунгасан нь сая дуусгавар болсон аж.
АНУ болон Европын орнууд дайныг эсэргүүцсэн ОХУ-д санхүүгийн хатуу хориг арга хэмжээ авч, олон улсын банк санхүүгийн SWIFT системээс хассан нь гадаад төлбөр тооцоогоо барагдуулахад асуудал үүсгэж буй. Мөн барууны орнууд ОХУ-ын Төв банкны гадаад валютын нөөцийг царцаасан зэрэг нь бондын төлбөрөө барагдуулж чадахгүйд хүргэжээ.
ОХУ-ын эрх баригчдын хувьд аливаа төлбөр тооцоог нөхөх хөрөнгөтэй бөгөөд барууныхан зохиомлоор дефолтод оруулж байна гэж шүүлжилсэн байна. Тус улсын Сангийн сайд Антон Силуанов дефолт зарласан мэдээг худал гэж үгүйсгэсэн бөгөөд “Хэн ч дуртай зүйлээ зарлаж болно” гэжээ. ОХУ өнгөрсөн долоо хоногт 40 тэрбум ам.долларын өрийн үлдэгдэл төлбөрөө рублиэр төлж барагдуулахаар болсноо зарласан байна. Гэсэн хэдий ч бонд эзэмшигчид рублиэр биш ам.доллар, еврогоор төлбөрөө барагдуулах үүрэгтэй сануулж байгаа юм.
Loomis Sayles & Company LP-ийн ахлах шинжээч Хассан Малик “Өр төлбөрөө барагдуулах боломжтой Засгийн газрыг өөр нэг Засгийн газрууд дефолтод оруулах нь маш ховор тохиолдол. Энэ нь түүхэн дэх томоохон хагарлыг авчирч магадгүй” гэжээ.
Токио дахь Номура судалгааны хүрээлэнгийн эдийн засагч Такахидэ Киүчи ихэнх бонд эзэмшигчид хүлээх, харах арга барилыг баримтлах нь зүйтэй. Энэ үйл явдлаар Оросын бонд эзэмшигчидтэй хийх маргаан дөнгөж эхэлж байна гэдгийг анхааруулжээ. Өнгөрсөн дөрөвдүгээр сарын байдлаар Оросын 20 тэрбум долларын евро бондыг гадаадынхан эзэмшиж байгаа аж.
Эргэн сануулахад, 104 жилийн өмнө буюу 1918 онд Орос улсыг Владимир Ленин удирдаж байх үед өрийн дарамтад орж, Орос орон гадаадын зээлдүүлэгчдийнхээ эсрэг дефолт зарласан.
Мөн 1998 онд рубль хүчтэй суларч, ОХУ санхүүгийн гүн хямралд орсны улмаас 40 тэрбум ам.долларын гадаад зээлээ төлж чадахгүйд хүрч байсан түүх бий.
Эх сурвалж: Bloomberg
