Хичээлийн шинэ жилийн нээлтийн үйл ажиллагааг цар тахлын нөхцөл байдалтай холбоотойгоор сүүлийн хоёр жил зохион байгуулаагүй.
Харин энэ жилийн тухайд сургууль, цэцэрлэгүүд 2022-2023 оны хичээлийн шинэ жилийн нээлтээ хийж, Чингис хааны эш хөргийг зална хэмээн албаны эх сурвалж хэллээ.
Монгол Улсын Ерөнхийлөгч У.Хүрэлсүх 2022 оны долдугаар сарын 11-ний өдөр гаргасан 159 дүгээр зарлигтаа “Төрийн бүх байгууллага, Монгол Улсаас хилийн чанадад суугаа дипломат төлөөлөгчийн газар, бүх шатны сургалтын байгууллагууд Эзэн Богд Чингис хааны эш хөргийг дээдлэн залсугай” хэмээн тусгасан билээ.
Үндэсний статистикийн хорооны сангийн мэдээллээс харвал 2021 оны байдлаар манай улсад ерөнхий боловсролын 848 сургууль, 1,453 цэцэрлэг байна.
2022-2023 оны хичээлийн жилийн нээлтийн өдөр Ерөнхийлөгч багш ажилтнууд, оюутан сурагчдад зориулан мэндчилгээ дэвшүүлнэ. Харин хичээл заахгүй аж.
