Бямба гарагт Польшийн эрх баригчид хараахан бүрэн дуусаагүй байгаа усан замын сувгийг нээх ёслолын арга хэмжээг зохион байгуулжээ.
Хэрвээ энэ суваг ашиглалтад орвол тус улсын хөлөг онгоцнууд Балтийн тэнгисээс Висла нуурын Элблаг боомтод хүрэхдээ ОХУ-аас зөвшөөрөл авах шаардлагагүй болох юм.
Нээлтийн ёслолыг дэлхийн хоёрдугаар дайны үеэр Зөвлөлтийн цэрэг Польшийн нутагт халдан довтолсны 83 жилийн ойтой зориуд давхцуулсан нь тус улс Оросоос эдийн засгийн хараат байдлаа багасгах хүсэл эрмэлзлээ харуулсан хэрэг болжээ.
Шинэ усан зам Калининградтай хиллэдэг Польшийн зүүн хойд бүс нутгийн эдийн засгийн хөгжилд чухал үүрэгтэй гэж Варшавын эрх баригчид үзэж байна.
“Энэ усан замыг нээснээр эрх баригчид нь бусад улс руу дайран довтлохоос буцдаггүй, найрсаг бус харилцаатай орноос зөвшөөрөл авах шаардлагагүй болж байна” гэж Польшийн ерөнхийлөгч Анджей Дуда нээлтийн үеэр хэлжээ. Нээлтийн ёслолын үеэр Зодиак II хөлөг сувгаар анх удаа нэвтэрсэн байна. Ням гарагаас эхлэн жижиг хэмжээтэй хөлөг онгоцнууд сувгаар зорчиж эхлэх юм.
Усан замын сувгийг байгуулахад хоёр тэрбум злот ($420 сая) зарцуулсан байна. Өмнө нь Элблагийн боомтод хүрэхийн тулд Польшийн хөлгүүд Балтийн тэнгисээс Оросын Пилавагийн хоолойгоор нэвтрэх хэрэгтэй болдог байжээ.
Бас шинэ зам нээгдсэнээр Балтийн тэнгисээс Польшийн эх газрын боомтод хүрэх зам 100 км-ээр богиносож байгаа гэнэ.
Гэхдээ том хэмжээний ачааны хөлгүүд энэ сувгаар зорчихын тулд Элблагийн боомтын гүнийг таван метрээр ахиулах хэрэгтэй байгаа ажээ.
Энэ ажилд 100 сая злот ($21 сая) шаардлагатай бөгөөд эх үүсвэрийг хаанаас гаргах асуудал Польшийн засгийн газар болон орон нутгийн захиргааны хооронд яригдаж байгаа гэнэ.
Эх сурвалж: Associated Press
