Крымийн гүүрийг Украины аюулаас хамгаалах алба дэлбэлсэн гэж ОХУ-ын ерөнхийлөгч Владимир Путин өчигдөр мэдэгджээ.
Тэрбээр ОХУ-ын мөрдөн байцаах товчооны тэргүүн Александр Бастрыкинтай уулзахдаа ингэж хэлсэн байна.
“Энэ бол Оросын иргэний зориулалттай дэд бүтцийн чухал байгууламжуудыг устах зорилготой террорист халдлага гэдэг нь эргэлзээгүй. Үүнийг зохион байгуулагч, гүйцэтгэгч, ашиг хүртэгч нь Украины аюулаас хамгаалах алба юм” гэж Путин энэ үеэр хэлжээ.
Халдлагыг зохион байгуулахад Оросын иргэд, гадаад улс орнууд тусалсныг Бастрыкин энэ үеэр бас хэлсэн байна.
Халдлагад ашигласан шатахуун тээвэрлэгч автомашин өмнө нь Болгар, Армени, Гүрж, Умард Осет, Краснодарын хязгаараар зорчсон баримтыг илрүүлснээ тэр Путинд мэдээлжээ.
Бямба гарагийн өглөө Крымийн хойгийг ОХУ-ын эх газартай холбодог гүүрэнд хүчтэй дэлбэрэлт болж, авто замын нэг урсгал нь эвдэрч, нурсан юм.
Одоогоор Украины тал халдлагыг үйлдсэнээ хүлээн зөвшөөрөөгүй байна.
Путиний мэдэгдлийг Украины ерөнхийлөгч Володимир Зеленскийн зөвлөх Михайло Подоляк үгүйсгэжээ.
“Бүх дэлхий аль улс нь террорист улс болохыг мэдэж байгаа. Путин Украиныг терроризмд буруутгалаа гэж үү? Оросын хувьд ингэх нь хэтэрхий инээдтэй харагдаж байна” гэж тэр сошиал хуудсандаа бичсэн байна.
Бямба гарагт хийсэн ээлжит мэдэгдэлдээ Зеленский “Өнөөдөр манай улсын газар нутагт нарлаг сайхан өдөр болж өнгөрлөө. Харамсалтай нь Крымд үүлэрхэг байлаа. Хэдийгээр дулаахан ч гэсэн” гэж ярьжээ.
2018 онд нээгдсэн 19 км урт Крымийн гүүр нь Европын хамгийн урт гүүр бөгөөд Крымийн хойгийг 2014 онд ОХУ-д нэгтгэсэн үйл явдлын бэлгэдэл болдог.
Уг гүүрээр Оросын талаас зэр зэвсэг, цэргийн хангамжийг Украины өмнөд фронт руу тээвэрлэдэг байв.
Гэхдээ ачааны автомашинд суурилуулсан бөмбөг гүүрэн дээр дэлбэрсэн гэх тайлбар сэжигтэй сонсогдож байгааг зарим мэргэжилтнүүд тайлбарлаж байна.
Тухайлбал Их Британийн армийн тэсрэх бодисын мэргэжилтэн энэ талаар “Би том оврын авто машинд тавьсан бөмбөг дэлбэрэхийг олон удаа харсан. Гэхдээ энэ удаагийн дэлбэрэлт их өөр байгаа юм. Гүүрнүүд ерөнхийдөө дээрээс доош чиглэсэн ачааллыг эсэргүүцэх бүтэцтэй байгуулагддаг. Бас хажуу талаас үлээх салхины хүчийг тэсвэрлэхээр бүтээгддэг. Харин доороос дээш чиглэсэн хүчийг эсэргүүцэхээр бүтээгддэггүй. Энэ чанарыг Украины тал ашигласан гэж бодож байна” гэж ярьжээ.
Өөрөөр хэлбэл гүүрний дороос ямар нэг тэнгисийн дрон ашиглан дэлбэлсэн байх өндөр магадлалтай гэж тэр дүгнэж байна.
Дэлбэрэлтээс хэдхэн секундийн өмнө гүүрний доор завь маягийн жижиг биет харагдсаныг зарим хяналтын камерын бичлэгийг үзсэн хүмүүс баталж байгаа юм.
Эх сурвалж: BBC
