Украины арми Чечень дэх цэргийн сургалтын баазад нисгэгчгүй нисэх онгоцоор цохилт өгчээ. Энэ нь Оросын өмнөд хэсэгт орших Бүгд найрамдах улсад өгсөн анхны цохилт байв. Түүнчлэн Украины туршсан хамгийн холын зайн дроны цохилтуудын нэг байжээ. Чеченийн удирдагч Рамзан Кадыров уг халдлагын хариуг авна гэж мэдэгдлээ.
Тусгай хүчний сургалтын төвийг онилсон боловч Рамзан Кадыров Оросын дайныг өндөр түвшинд дэмждэг учир энэ халдлага нь үндсэндээ бэлгэдлийн чанартай байжээ. Халдлага болсон Гудермес хот нь Чеченийн нийслэл Грозныйгоос зүүн зүгт 35 км зайд байдаг. Оросын тусгай хүчний их сургууль буюу энэ удаагийн цохилтод өртсөн баазыг 2013 онд Гудермест байгуулжээ. Бүтээн байгуулалтын ажлыг нь Рамзан Кадыров гардан хариуцаж байв.
Кадыров энэ талаар жиргэхдээ “Өнөөдөр өглөө 06:30 цагт Гудермес дэх Оросын тусгай хүчний их сургуулийн барилга агаарын довтолгоонд өртөж, гал гарав. Хүн бэртэж, гэмтээгүй бөгөөд галыг бүрэн унтраалаа. Гэмт этгээдүүдэд тэдний төсөөлж ч байгаагүй шийтгэлийг амсуулах болно” гэжээ.
Тус сургалтын баазыг Орост байхгүй онцгой сургалтын талбай, арга зүй, багшлах боловсон хүчинтэй мэргэжлийн байгууллага гэж тодорхойлдог. Зөвхөн цэргүүд гэлтгүй энгийн иргэд ч энд сургалтад хамрагдах боломжтой. Сургалтын хөтөлбөрт тулааны тактик, буу, нисгэгчгүй нисэх онгоцтой ажиллаж сурах, байлдааны үеийн анхны тусламж, шүхрээр буух зэрэг багтдаг. Украинд очиж байлдсан 47 мянга гаруй цэрэг Гудермест сургалтад хамрагджээ. Үүний зэрэгцээ 19 мянга гаруй сайн дурынхан Украинд тулалдахаасаа өмнө сургалтад хамрагдсаныг “Тасс” агентлаг мэдээлсэн байна.
Украины арми ОХУ дахь байг онилохын тулд алсын зайн цохилтуудыг өгч байна. Гудермес нь Одессагаас 1255, Харьковоос 1050 км зайд байрладаг. Алсын зайн цохилтуудаар Оросын нутаг дэвсгэрийг онилж байсан ч Чечень дэх байд цохилт өгсөн нь анхны тохиолдол боллоо.
