УИХ-ын чуулганы үдээс өмнөх нэгдсэн хуралдаан болж байна.
Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуулийн шинэчилсэн найруулгын төсөл болон хамт өргөн мэдүүлсэн хуулийн төслүүдийг хэлэлцэх эсэхийг дэмжээд Эдийн засгийн байнгын хороонд шилжүүллээ.
Үргэлжлүүлэн Хөрөнгө оруулалтын банкны тухай хуулийг анхны хэлэлцүүлгийг хийж байна.
Хуулийн төсөлтэй холбогдуулан УИХ-ын гишүүн Б.Энхбаяр “Төслийн 10.7 дахь заалтад Хөрөнгө оруулалтын төрөлжсөн банкнаас үнэт цаас санхүүгийн хэрэгсэл худалдан авах харилцааг Монголбанк, Санхүүгийн Зохицуулах хорооноос баталсан журмаар зохицуулна гэжээ. Энэ харилцааг журам биш Үнэт цаасны тухай хуулиар зохицуулах ёстой. Хэрвээ уг асуудлыг хуульчлахгүй бол хулгай гарна.
Мөн Хөрөнгө оруулалтын банкнаас гаргах баталгаа, батлан даалт тавих шаардлага нөхцөлийг Монголбанк журмаар зохицуулна гэсэн ерөнхий ганц үг оруулжээ. Үүнийг ямар нөхцөлд баталгаа гаргах, ямар шаардлага тавих зэргээр дэлгэрүүлж оруулах хэрэгтэй. Үндсэн хуульд зааснаар Төрийн мөнгөний бодлого, зээлийн асуудлыг УИХ-аар тогтоох ёстой. Энэ бүрэн эрхийг Монголбанк журам гаргаад авах гээд байна.
Хөгжлийн Банкны хэргийг шалгаж байхад өөрийн банкнаас гаргасан зээлийг хамаарал бүхий этгээддээ олгодог асуудал олон гарсан. Судлаад үзэхээр Монголбанк эл асуудалдаа өөрсдөө оролцдог нь тогтоогдсон. Тийм учраас Монголбанкнаас журам хэлбэрээр олгоход миний бие итгэхгүй байна. Эцсийн хэлэлцүүлэг дээр гүйцээн боловсруулах хэрэгтэй” гэв.
Өнөөдрийн хуралдаанаар хэлэлцэх асуудлууд:
- Хууль тогтоомжийн тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төслүүд /Засгийн газар 2022.11.30-ны өдөр өргөн мэдүүлсэн, хэлэлцэх эсэх, үргэлжилнэ/
- Монгол Улс, Азийн дэд бүтцийн хөрөнгө оруулалтын банк хоорондын Зээлийн хэлэлцээр (Мөчлөг сөрсөн бодлогын арга хэмжээг дэмжих хөтөлбөр)-ийн төсөл /Засгийн газар 2022.12.21-ний өдөр өргөн мэдүүлсэн, соёрхон батлах, үргэлжилнэ/
- Хөрөнгө оруулалтын банкны тухай хуулийн төсөл болон хамт өргөн мэдүүлсэн хуулийн төслүүд /Улсын Их Хурлын гишүүн Б.Жавхлан нарын 18 гишүүн 2016.12.28-ны өдөр өргөн мэдүүлсэн, анхны хэлэлцүүлэг, үргэлжилнэ/
- Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуулийн шинэчилсэн найруулгын төсөл болон хамт өргөн мэдүүлсэн хуулийн төслүүд /Засгийн газар 2022.12.14-ний өдөр өргөн мэдүүлсэн, хэлэлцэх эсэх, үргэлжилнэ/
- “Зөвлөлдөх зөвлөлийн бүрэлдэхүүнийг батлах тухай” Улсын Их Хурлын тогтоолын төсөл
- Гадаадын иргэний эрх зүйн байдлын тухай хуульд нэмэлт, оруулах тухай хуулийн төсөл болон хамт өргөн мэдүүлсэн Төрийн албаны тухай хуульд нэмэлт оруулах тухай хуулийн төсөл /Улсын Их Хурлын гишүүн Б.Пүрэвдорж 2022.10.21-ний өдөр өргөн мэдүүлсэн, эцсийн хэлэлцүүлэг/
- “Хууль баталсантай холбогдуулан авах арга хэмжээний тухай” Улсын Их Хурлын тогтоолын төсөл /Уул уурхайн бүтээгдэхүүний биржийн тухай хуулийн төсөлтэй холбогдуулан боловсруулсан, эцсийн хэлэлцүүлэг/
- “Хөгжлийн зорилтот хөтөлбөр батлах тухай” Улсын Их Хурлын тогтоолын төсөл /Засгийн газар 2022.07.05-ны өдөр өргөн мэдүүлсэн, хэлэлцэх эсэх/
- Нүүрсний экспорт, тээвэрлэлттэй холбоотой асуудлаар холбогдох эрх бүхий байгууллагуудын тайлан, мэдээлэлтэй танилцах ерөнхий хяналтын сонсголын тайланг сонсох
- Ерөнхий сайдын мэдээлэл: Монгол Улсын төрийн цахим шилжилтийн өнөөгийн байдал, цаашдын зорилтуудын талаар хэлэлцэнэ.
