УБТЗ-ын авлига, албан тушаалын гэмт хэрэг, ажлын байран дахь дарамт хүчирхийлэл болон цаг үеийн бусад асуудлаар Монголын Төмөр замчдын Үйлдвэрчний эвлэлийн холбооноос хэвлэлийн бага хурал хийв.
ҮЭ-ийн дарга Б.Баяраа “Бид МАН-ын дарга М.Энхболдод 2017 онд шаардлага хүргүүлсэн юм. Гэвч үүнээс хойш юу ч өөрчлөгдсөнгүй. Намайг хоёр удаа хуулийн байгууллагаар шалгуулсан.
Шүүх энэ асуудалд татагдан орсон байж болзошгүй. УБТЗ-ын дээд түвшний дарга нарыг ч шалгах ёстой. УБТЗ бол хувь нийлүүлсэн байгууллага. ТУЗ буюу Ерөнхий хороонд Оросын талаас 3, манай талаас 3 гишүүнтэй. Манай улсын Зам тээврийн хөгжлийн дэд сайд Монголын багаа ахалдаг. Ерөнхий хороонд хяналт тавих үүрэгтэй, хөндлөнгийн гишүүнээр Б.Цогтгэрэл ажилладаг. Энэ хүн төмөр замчин биш, улс төрийн хүрээний хүн тул энэ томилгоо буруу гэдгийг бид хэлсэн, эсэргүүцсэн.
Зам тээврийн хөгжлийн сайд С.Бямбацогт өчигдөр манай ажилчдад 13 дахь сарын цалинг 200 хувиар олгох чиглэл өгчээ. 2022 онд УБТЗ алдагдалтай ажилласан тул ажилчдад 100 хувийн урамшуулал олгох шийдвэр гаргасан байв. Бид буюу ҮЭ урамшуулал нэмэх шаардлага тавихаар удирдлагууд боломжгүй, мөнгө байхгүй гэдэг. Харин сайд чиглэл өгөнгүүт одоо хаанаас яаж урамшуулал өгөх үү гээд хайж байна. Улс төрчид энэ мэтээр манай байгууллагад хэт их оролцож, нөлөөлж байна.
УБТЗ бэлгийн дарамт, сэтгэл санааны дарамт үзүүлсэн тохиолдлууд олон. Тэдгээр хүмүүст хариуцлага тооцдоггүй. Хэрэг хийнгүүтээ нэг жилийн чөлөө аваад явдаг, энэ хугацаа нь дуусахаар ажилдаа ордог” гэв.
Мөн тэрээр “Чингис хаан банканд байршуулсан, Нийгмийн даатгалын 96 тэрбум төгрөг мөн л алга болсон. Тухайн үед Нийгмийн даатгалын үндэсний хорооны даргаар С.Чинзориг сайд ажиллаж байсан. Одоо энэ хүн Эрүүл мэндийн сайд болж, Эрүүл мэндийн даатгалын санг самрах нь.
2022 онд УБТЗ 6 тэрбум төгрөгийн алдагдалтай ажиллажээ. БНХАУ хүлээн авах галт тэрэгний тоогоо бууруулсан тул ажлын хэмжээ буурсан, зардал өссөн байна. Түлшний зардал өссөн нь УБТЗ-д сөргөөр нөлөөлсөн.
БНХАУ 2022 оны есдүгээр сараас хойш хоногт 14 галт тэрэг солилцож эхэлсэн. Ингэснээр ачаа, нүүрсний экспорт ихээхэн өссөн. Нүүрс тээвэрлэдэг хагас вагоны эрэлт өссөн юм. Бид эрэлтийг ханаж чадаагүй. Нүүрс тээврийн үнийг чөлөөлж, тарифыг нэмбэл УБТЗ-ын бодит орлого өснө. Энэ орлогоор ажилчдын цалинг нэмэх боломжтой. Хагас вагоны тээврийг нээлттэй, дуудлага худалдаагаар ойрхон байгуулах санал тавьж байна.
Харин УБТЗ тээврийн тарифаа өсгөөгүй. Өнөөдөр үүссэн нөхцөл байдалд манай ажилчид маш их бухимдан, унтууцаж байна. 16 мянган хүн төмөр замын тээврийг тасралтгүй, аюулгүй явуулахад маш их хүчин чармайлт гарган ажилладаг. УБТЗ-ын тээвэр зохион байгуулалтад 3000 хүн ажилладаг. Энэ хүмүүс авлигын тээвэрт гар бие оролцсон нь маш харамсалтай. Эдгээр хүмүүсийн нэр хүндийг цэвэрлэх шаардлагатай.
Өнгөрсөн онд УИХ-ын гишүүд УБТЗ-д авлига байна гэдгийг хэлж байсан. УБТЗ-ын далд эдийн засгийг ил болгох шаардлагатай. Тээвэр зохион байгуулалтын албаны дарга Д.Амарбаясгалан гэж хүнийг шалгах шаардлагатай. Энэ хүний хамаарал бүхий хүмүүс АТГ-ын ойрын хамаатан юм байна. М.Цогт ОХУ-аас саяхан ирсэн. С.Бaтдөлийн дээд тушаалын хүн буюу Тээвэр зохион байгуулалтын албаны дарга. Энэ хүнийг мөн шалгах ёстой. С.Батдөл ганцаараа хэрэг үйлдэхгүй. Д.Амарбаясгалан дарга хүүгээ удирдлага доороо ажиллуулдаг. Хүү нь чингэлгүүдийг зохицуулдаг байж болзошгүй. УБТЗ-ын ажилчид бид авлига тээсэн ачаа тээвэрлэхгүй гээд төмөр замын тээврийн тарифын тогтолцоог шинэчлэхийг шаардлагатай” гэж мэдэгдлээ.
