Зохион байгуулалттай бүлэг үүсгэж гэмт хэрэг үйлдэж байгаа этгээдүүдийн сүүлийн таван жил болон одоогийн нөхцөл байдлын талаар ЭЦА-наас мэдээлэл өглөө.
Урьд өмнө удаа дараа ял шийтгэгдсэн, зохион байгуулалттай бүлэг үүсгэж аж ахуйн нэгж, иргэдийн хамгаалалтыг хариуцах халхавчаар гэмт хэрэг үйлдэж байсан этгээдүүдэд цагдаагийн байгууллагаас хяналт тавих, урьдчилан сэргийлэх, таслан зогсоох, үйлдэгдсэн гэмт хэргийг илрүүлэх ажлуудыг тогтмол зохион байгуулсаар ирсэн байна.
ЭЦА-наас мэдээлснээр сүүлийн таван жилд:
- 2019 онд нийт таван бүлгийн зургаан этгээдийг,
- 2020 онд таван бүлгийн 15 этгээдийг,
- 2021 онд гурван бүлгийн зургаан этгээдийг,
- 2022 онд зургаан бүлгийн 12 этгээдийг эрүүгийн хариуцлага татаж шүүхээс хорих ял шийтгэл оногдуулжээ.
Энэ оны эхний улирлын байдлаар зохион байгуулалттай гэмт бүлэг байгуулах түүнд элсэх гэмт хэргийн шинж агуулж байгаа найман бүлгийн 21 этгээдийн хууль бус үйлдлийг шалгаж, таван бүлгийн 13 этгээдэд эрүүгийн хэрэг үүсгэж яллагдагчаар татан мөрдөн шалгах ажиллагааг цагдаагийн байгууллагаас үргэлжлүүлэн явуулж байгаа аж.
Одоогийн байдлаар:
- Удаа дараа ял шийтгэл эдэлсэн, хэрэг бүртгэл нээж, мөрдөн шалгах ажиллагаа явуулж байгаа 11
- Яллагдагчаар татан шүүх прокурор луу шилжсэн 19
- Зорчих эрхийг хязгаарлах ял шийтгэгдэж байгаа гурав
- Хорих ял эдэлж байгаа зургаан этгээд байна.
ЭЦА-ны дарга, хурандаа Т.Сүхболд “Урьд өмнө удаа дараа ял шийтгэл эдэлсэн этгээдүүд нь нийгэмд айдас түгшүүр төрүүлж, бусдыг заналхийлж иргэдийн эрх чөлөө, эрүүл мэнд, эд хөрөнгөд халдан тогтвортой үйл ажиллагаа явуулж байгаа гэмт бүлэглэл одоогоор байхгүй.
Цагдаагийн байгууллага тухайн этгээдүүдийг хяналтад байлгаж, хэрэг зөрчил үйлдэхээс урьдчилан сэргийлэх ажлыг түлхүү хийж ажиллаж байна.
Төр засагтай, хууль шүүхийн байгууллагатай улсад бусдыг далайлган дарамталдаг, хэн нэгнийг айлган сүрдүүлж өмчийг нь авдаг гэмт бүлэглэл байхгүй” гэсэн юм.
Түүнчлэн ЭЦА-наас цаашид энэ төрлийн гэмт хэргээс урьдчилан сэргийлэн, хохирсон иргэн аж, ахуй нэгж байгууллагууд цагдаагийн байгууллагын 102, Эрүүгийн цагдаагийн албаны 51262425 дугаарын утас руу холбогдон мэдээ, мэдээлэл өгч хамтран ажиллана уу. Мэдээллийн нууцлал, аюулгүй байдлыг чандлан хадгална гэдгийг мэдэгдсэн юм.
