УИХ-ын нэгдсэн чуулганаар Үндсэн хуульд нэмэлт, өөрчлөлт оруулах хуулийн төслийн хэлэлцэх эсэхийг хэлэлцэж байна. Хэлэлцэж байгаа асуудалтай холбогдуулан гишүүд асуулт асууж, хариулт авч байна.
УИХ-ын гишүүн Д.Ганбат: Үндсэн хуулийн нэмэлт, өөрчлөлтийн төслийг Засгийн газраас оруулж ирлээ. 152 гэдэг тоо хаанаас гарч ирсэн тоо вэ. Ямар үндэслэлтэй вэ. Үндсэн хууль бол Монголын ард түмэнтэй байгуулсан гэрээ, алганд багтсан эх орон гэж ярьдаг. Хамгийн сүүлд 2022 онд Үндсэн хуульд өөрчлөлт оруулж, баахан “давхар дээл”-тэй сайдтай болсон. Энэ алдаагаа засахын тулд энэ төслийг оруулж ирж байна гэж ойлгож байна. Хэрвээ энэ өөрчлөлтийг баталж чадахгүй бол та нар хариуцлага хүлээнэ. Юун 2008 оны долдугаар сарын 1. Магадгүй үүнээс дор юм болж магадгүй. Өнгөрсөн 8 жил та нар Монголын ард түмнийг хүсээд байгаа шиг нь амьдруулж чадсангүй. Өнөөдөр болж, бүтэж байгаа юм хаана байна. Баахан хулгайч, дээрэмчидтэй л ноцолдож байна.
Ерөнхий сайд Л.Оюун-Эрдэнэ: Авлигын хэрэг гээд яривал олон зүйл нь төвөгтэй нөхцөл байдалтай тулна. Танайхантай илүү холбоотой. 17 хувийн өсөлттэй байсан эдийн засгийг үрэн таран хийчихсэн 10 гаруй жилийн алдааг засах гэж ийм хугацаа орж байна. ДНБ 10 мянган ам.доллар болгох зорилт тавиад хамтдаа зүтгэмээр байгаа юм. Ийм агуулгаар хандаасай. Танкчин хүний хувьд эх оронч байгаад, аливаа асуудалд ул суурьтай хандаад яваарай.
УИХ-ын гишүүн Д.Ганбат: Намайг танкчингаар нь дуудаад. Би тэгэхээр нь сумын төвд жижүүр хийж байгаад Ерөнхий сайд болно гэдэг бас л мундаг ш дээ гэж хэлмээр байгаа юм.
Та 62 суудалтай намын дарга, Ерөнхий сайд. Энэ өөрчлөлтдөө итгэлтэй байна уу. Хэрвээ өргөн барьснаар чинь батлагдахгүй бол дахиад нөгөөхөө ярих уу. “Үүнээс болоод болсонгүй, та нар баталж өгөхгүй байсаар байгаад ийм болгочихлоо” гэх юм биш биз дээ. Та нарт 62 кноп байна. Юу дуртайгаа хийх ёстой ш дээ. Дараа нь хариуцлагаа үүрэх хэрэгтэй. Энэ өөрчлөлтөө хийж чадахгүй бол 2024 оны сонгуулиар МАН арчигдана, байхгүй болно. Та ярьж байхдаа АН гээд л оруулаад ярилаа.
