Соёлын сайд Ч.Номин Засгийн газрын ээлжит хуралдаанаас гарсан шийдвэрийг танилцууллаа.
Соёлын сайд Ч.Номин:
“2022 оноос хэрэгжиж эхэлсэн Соёлын тухай хуульд төвөөс алслагдмал газар байрлаж байгаа соёлын байгууллагын албан хаагч нарт таван жил тутам зургаан сарын үндсэн цалинтай тэнцэх нэг удаагийн тэтгэмж олгох заалт бий. Энэ заалтыг хэрэгжүүлэх журмыг Засгийн газраас баталлаа.
Ингэснээр соёлын салбарын 452 байгууллага байдаг. Үүнээс 432 байгууллага орон нутагт үйл ажиллагаа явуулдаг. Эдгээр байгууллагад ажилладаг 4470 албан хаагчийн 3002 хүнд нэг удаагийн 5 жил тутамд олгогдох зургаан сарын цалинтай дүйцэх тэтгэмж олгогдоно. Ингэснээр орон нутагт үйл ажиллагаа явуулж буй соёлын салбарын албан хаагчдын 70 хувьд нь тэтгэмж олгох шийдвэр гарлаа.
Төрийн байгууллагуудад ажилладаг албан хаагчдаас соёлын салбарынхан доогуур цалин хангамж авдаг. Энэ бол сүүлийн 20 гаруй жил бугшсан явдал. Соёлын салбарынхны цалин 570-995 мянган төгрөгийн хооронд байна. Дундаж цалин 760 мянга орчим төгрөг байна.
Соёлын салбарынхантай уулзахад гарсан 4-5 асуудал байна. Цалин амьжиргаанд хүрэлцэхгүй байна. Цалин нэмж өгөөч гэсэн хүсэлт ирсэн. Манай салбарын ажилтан албан хаагчдын цалин хөлсийг боловсрол, шинжлэх ухааны салбарынхантай дүйцүүлнэ. Энэ ондоо багтаан дүйцүүлнэ” гэлээ.
skip-share
Байгууллагууд орлогынхоо 60 хувийг албан хаагчдын нийгмийн баталгаанд зарцуулах боломжтой болсон.
Түүнчлэн “Сүүлийн хоёр жилд соёлын салбарын хууль эрх зүйн орчин сайжирсны хүрээнд 10 орчим төрлийн нэмэгдэл хөлс урамшуулал авах боломж бүрдсэн. Мөн байгууллагууд олсон орлогынхоо 60 хүртэлх хувийг ажилтан албан хаагчдын нийгмийн баталгаанд зарцуулах боломжтой болсон. 2022 онд Сангийн яамтай хамтран үр дүн дээр суурилсан нэмэлт санхүүжилтийн тогтолцоо бий болгосон. Ингэснээр нэмэлт санхүүжилтийг авч бодит ур чадварыг үнэлүүлэх үр дүн дээр суурилсан KPI авах боломж бүрдсэн” гэлээ.
