Засгийн газрын хуралдааны шийдвэрийг ЗГХЭГ-ын дарга Д.Амарбаясгалан танилцуулж байна.
“Оны өмнө Ерөнхий сайдын өгсөн үүрэг даалгаврын дагуу агаарын тээврийн үнийг буулгах ажил чухал байна гэж үзэж байсан. Тиймээс өнөөдрийн Засгийн газрын хуралдаанаар нислэгийн тийзийн үнийг бууруулах талаар хэлэлцлээ. 2023 оны 7-р сарын 1-нээс агаарын тээврээр зорчдог 9 аймагт билетийн үнэ 50-70 хувь хямдарч байна.
Жишээ нь, өнөөдрийн байдлаар Баян-Өлгий аймаг руу хоёр талдаа нисэхэд 1,650,000 төгрөг байгаа бол оруулж ирж байгаа саналаар 800 мянгаас бага үнээр нисэх боломж нээгдэж байна. Ховд, Увс руу 1.6 сая төгрөгөөр нисдэг бол эдгээр аймгууд 600-650 мянган төгрөгөөр нисдэг болох боломж нээгдэж байна.
Говь-Алтай, Баянхонгор, Завхан, Хөвсгөл, Өмнөговь, Дорнод зэрэг нийт 9 аймаг руу агаарын тээврийн зорчих хөдөлгөөний урсгалыг нэмэгдүүлэхээр болж байна. ААН-үүд иргэдийн худалдан авах чадварт нийцсэн, эдийн засгийн зөв тооцоолол хийж, иргэдэд илүү хямд төсөр үнээр үйлчлэх бодлого бариагүйн улмаас өнөөдрийн асуудал үүссэн гэж үзэж байна. Тиймээс МИАТ ТӨХК-ийг орон нутгийн нислэг үйлдэх боломжоор хангаад ЗГ-ын зүгээс ажиллаж байна.
2024.01.01-нийг хүртэл МИАТ гаднаас нойтон түрээсээр онгоц авч ашиглана. Үүнээс хойш өөрийн захиалсан онгоц буюу 75 хүний суудалтай орон нутгийн нислэг үйлдэх зориулалтын онгоцыг авснаар ахиад үнэ буурах нөхцөл бүрдэнэ. Монгол Улсад бизнесийн салбаруудад монополь бий болсон байна. Иргэний агаарын тээврийн өрсөлдөөнгүй салбар бий болсны хор уршгийг иргэд үүрч байна” гэлээ.
