Дэлхийн хамгийн урт настай үндэсний өдөр тутмын сонин гэгддэг Австрийн “Wiener Zeitung” бараг 320 жилийн дараа сүүлчийн дугаараа хэвлэжээ.
Энэ оны дөрөвдүгээр сард Австрийн засгийн газар тус сонины албан ёсны хэвлэл хэмээх статусыг цуцлах хууль батлуулсан юм. Ингэснээр компаниуд, байгууллагууд албан мэдэгдлээ тус сонинд төлбөртэй нийтлүүлэх шаардлагагүй болсон нь эдийн засгийн хувьд оршин тогтнох боломжгүй болгожээ.
Үүний улмаас “Wiener Zeitung” сонин 18 сая еврогийн орлогоо алдаж, 63 ажлын байраа цомхотгосон юм. Тухайлбал редакцын бүрэлдэхүүнээ 55-аас 20 болгон бууруулжээ.
Гэсэн ч үйл ажиллагааны зардлаа нөхөх хэмжээний орлого олохгүй болсон тул хэвлэлтээ зогсоохоор болсон байна.
Одоо тус сонин онлайн хувилбараа гаргаж, сар тутам хэвлэгддэг цаасан хувилбартай болохоор төлөвлөж байгаа гэнэ.
Австрийн засгийн газрын харьяанд байдаг, редакц нь хараат бус ажилладаг “Wiener Zeitung” сонин 1703 оны наймдугаар сард анх хэвлэгдэж байжээ.
Өнгөрсөн хугацаанд тус сонин 12 ерөнхийлөгч, 10 кайзер, хоёр бүгд найрамдах улсын нүүрийг үзсэн байна.
1768 онд уг сонин онцгой гоц авьяастай, 12 настай хүүгийн концертын талаар мэдээлж байжээ. Тэр хүү нь Вольфганг Амадей Моцарт байсан юм.
Баасан гарагт гарсан сүүлчийн дугаарт албан ёсны статусыг нь цуцалсан засгийн газрынхаа шийдвэрийг шүүмжилсэн редакцын нийтлэл хэвлэгджээ.
“Wiener Zeitung” сонин түүхэндээ ганцхан удаа тасалдаж байв. Дэлхийн хоёрдугаар дайны үеэр Австрийг эзэлсэн Нацист Германы эрх баригчид 1939 онд тус сонины үйл ажиллагааг зогсоож байжээ. Харин 1945 онд дахин хэвлэгдэж эхэлсэн байна.
“Wiener Zeitung” нь хамгийн урт настай албан ёсны өдөр тутмын хэвлэл гэдгээрээ онцгой юм. Харин албан ёсны статусыг тооцохгүйгээр хамгийн эртний сонин гэдэг алдрыг 1664 онд анх хэвлэгдсэн Италийн “Gazzetta di Mantova” орон нутгийн хэвлэл эзэмшдэг юм байна.
Үүнээс гадна Их Британийн засгийн газрын төв хэвлэл “The London Gazette” 1665 оноос хойш хэвлэгдсэн ч үйл явдлын мэдээ нийтэлдэггүй юм.
Одоо үлдсэн хамгийн эртний албан ёсны хэвлэл нь 1705 оноос хойш хэвлэгдсэн Германы “Hildesheimer Allgemeine Zeitung” сонин болж байна.
Эх сурвалж: The Guardian
