Дэлхийн томоохон сошиал платформуудын нэг Твиттерийг худалдаж аваад удаагүй байгаа тэрбумтан Илон Маск бас нэг өөрчлөлтийг танилцуулахаар төлөвлөж байгаагаа Ням гарагт зарлажээ.
Энэ удаа тэр Твиттерийн гол таних тэмдэг болсон шувууны дүрсээс салахаар шийдсэн байна.
“Бид удахгүй Твиттер брэнд болон бүх шувуудаас аажмаар салах болно” гэж тэр өчигдөр мэдэгджээ.
Маск цааш нь бичихдээ “Хэрвээ өнөөдөр хангалттай сайн X логотой болчихвол бид маргааш дэлхий даяар цацах болно” гэж бичсэн байна.
Дараа нь тэр нэг дагагчийнхаа асуултад хариулахдаа “ийм өөрчлөлтийг эрт хийх байсан юм” гэж бичжээ.
Өнгөрсөн оны аравдугаар сард Твиттерийг $44 тэрбумаар худалдаж авснаасаа хойш Маск маш олон өөрчлөлт нэвтрүүлж, компанийн ашигт ажиллагааны түвшнийг сайжруулахыг хичээж байгаа.
Тухайлбал тэр компанийн нэрийг “X Corp” болгон өөрчилсөн юм.
Энэ нь Твиттерийг супер аппликэйшн болгох түүний хэтийн төлөвлөгөөний нэг хэсэг байв. Твиттер нь хөх өнгийн шувууны дүрстэй логогоороо дэлхий дахинд танигдсан байдаг.
Өнгөрсөн дөрөвдүгээр сард Маск уг логог хэсэг хугацаанд Dogecoin-ий Шиба Ину нохойн дүрсээр сольж байв.
Энэ сарын эхээр Маск хэрэглэгчдийн өдөрт үзэх жиргээний тоог хязгаарлаж байгаагаа зарлаад нэлээд шүүмжлүүлсэн юм.
Уг хязгаарлалт нь Твиттерийн шууд өрсөлдөгч болж зах зээлд гарч ирсэн Threads үйлчилгээний хэрэглэгчийн тоог хурдтай өсөхөд нөлөөлж байгаа.
Фэйсбүүк, Инстаграмыг эзэмшигч Мета компанийн Threads үйлчилгээ зах зээлд гарсан эхний тав хоногийн дотор 100 сая давсан тооны хэрэглэгчтэй болсон юм.
Эх сурвалж: Reuters
