Сүүлийн үед Ц.Элбэгдоржийг тойрсон “Ачит ихт” компани, “С.Зориг агсны амиа алдсан хэрэг”, “Эрдэнэт үйлдвэр” зэрэг хэргүүд олны анхааралд орж, олон нийтийн сүлжээнд ч бараг л хэлэлцүүлэг өрнөж байгаа гэхэд болно.
Тухайлбал, Ерөнхий сайд асан С.Баяр “С.Зориг Ерөнхий сайд болохоор яригдаж байхдаа амиа алдсан” гэдгийг тодотгож байгаа бол, Ерөнхийлөгч асан Ц.Элбэгдорж “С.Зоригийг Ерөнхий сайдаар томилох тухай ерөнхий зөвлөл дээр юу ч яригдаагүй” гэж мэдэгдсэн. Үүнээс хойш олон нийтийн сүлжээнд зохион байгуулалттай, зохион байгуулалтгүй олон янзын хэлэлцүүлэг, байр суурь өрнөх болсон. Харин өөрт талагдаагүй иргэний байр суурийг зохион байгуулалттай “тролл” гэж үзэх бий. Тэгвэл твиттер сүлжээнд Ц.Элбэгдорж болон С.Баяр маргалдаж, нэг нь “Эбиг /Ц.Элбэгдорж/-ийн тролл элбэг болж” гэсэн бол, нөгөө нь “”Галавсаа-Баяр” бурж байгаа шиг тороол тэжээх шаардлага надад байхгүй” гэжээ.
Тодруулбал, Ерөнхий сайд асан С.Баяр өөрийн твиттер хуудастаа, “Эби /Ц.Элбэгдорж/-ийн тролл элбэг болж. Өөрийг нь шүүмжилсэн, эсвэл жоохон эвгүй асуулт асуусан пост тавьмагц троллууд нь батгана шиг бужигнаад, хараал зүхэл хэлсээр ороод ирнэ. “Таван үгэндээ танигдаад байна” гэдэг шиг болхи бүдүүлгийн туйл болсон тролл. Цагтаа Эби ийм троллудыг элдэвлэж байв” гэжээ.
Харин Ерөнхийлөгч асан Ц.Элбэгдорж үүнд хариу болгож өөрийн твиттер хуудастаа, “Эрх чөлөөг, Монголоо өмөөрсөн бүхнийг миний тороол гэж загнах болжээ. “Галавсаа-Баяр” /С.Баяр/ бурж байгаа шиг тороол тэжээх шаардлага надад байхгүй. Тэд бол өөрийн гэсэн санал бодолтой ориг хүмүүс. Харин Оюутолгойгоос том ажил олгогч болсондоо би талархаж сууна. Ийм статистик гарч. Монголын эсрэг, эрх чөлөөний эсрэг, миний эсрэг бот, цулам, тороол армийн тоо даруй хоёр түм давлаа гэсэн. Бүх засаг захиргааны нэгж, хот сууринг хамарсан цалин урамшуулалтай өргөн айлсалт. Гадны гар оролцоо, санхүүжилттэй нь ч бий. Саруул ухаан, сайн сайхныг хүсэн ерөөе” гэжээ.
