Нисэх онгоц нь эвдэрсний улмаас Канадын ерөнхий сайд Жастин Трюдо эх орондоо буцаж чадалгүй Энэтхэгт гацжээ.
Тэрбээр өнгөрсөн долоо хоногийн сүүлээр Дели хотод зохион байгуулагдсан Их 20-ын бүлгийн дээд хэмжээний чуулганд оролцсон юм.
Ням гарагт эх орны зүг жолоо залах байсан Трюдогийн онгоцонд техникийн асуудал гарсан тул хөөрөх боломжгүй болжээ.
Канадын агаарын зэвсэгт хүчин одоо хамгийн эртдээ Мягмар гарагийн үдээс хойш Трюдог авахаар ажиллаж байгаа юм байна.
Ерөнхий сайдыг Энэтхэгт хүргэсэн 01 дугаартай Канадын Агаарын Хүчний CC-150 Polaris нисэх онгоцны эд анги эвдэрсэн тул шинээр солихоос өөр аргагүй болсныг албаныхан мэдэгджээ
Трюдог авахаар хөөрсөн хоёр дахь онгоц өнөөдөр Энэтхэгийн нийслэлд хүрэх юм.
Энэтхэг, Канад улсуудын харилцаа ээдрээтэй байгаа цаг үед Трюдо ийнхүү саатаж байна.
Саяхан Канадын тал Энэтхэг улстай худалдааны гэрээ байгуулах яриа хэлэлцээгээ зогсоосон юм. Үүнд Канадын хүн амын тодорхой хэсгийг эзэлдэг Сикх үндэстэнтэй холбоотой маргаан нөлөөлжээ.
Сикхийн тусгаар тогтнолын хөдөлгөөний идэвхтэн Хардип Сингх Нижжар энэ оны зургаадугаар сард Канадын Бритиш Колумбиа мужийн нутаг дэвсгэрт нүүрэндээ багтай хоёр хүнд буудуулж алагдсан юм.
Үүний улмаас Канадын Сикх гаралтай иргэд Торонто хот дахь Энэтхэгийн элчин сайдын яамны гадна эсэргүүцлийн цуглаан зохион байгуулж байв. Энэтхэгийн эрх баригчид Нижжарыг захиалж алуулсан гэж тэд үзэж байлаа. Энэ хэргийг Канадын тал одоо мөрдөн шалгаж байгаа.
Дели хотод Трюдотой уулзах үеэрээ Энэтхэгийн ерөнхий сайд Нарендра Моди “Канад дахь экстремист элементүүдийн Энэтхэгийн эсрэг үйл ажиллагаа”-нд санаа зовж байгаагаа илэрхийлжээ.
Хариуд нь Трюдо “хууль дүрэмд захирагдах ёс, ардчиллын зарчим, улс үндэстний бие даасан байдал” зэргийн чухлыг онцолсон тухай Канадын талын албан мэдээнд дурдсан юм.
Эндээс тэдний уулзалт ямар уур амьсгалтай болж өнгөрсөн нь тодорхой харагдаж байна.
Эх сурвалж: BBC
