Аравдугаар сарын 30-наас эхлэн баруун болон төвийн аймгуудын нутгийн зарим газраар, өдөртөө төвийн аймгуудын нутгийн зарим газар, зүүн аймгуудын нутгийн хойд хэсгээр хур тунадас орж, орон нутгийн зам, даваанд халтиргаа гулгаа үүссэнийг Онцгой байдлын газраас анхааруулсан.
Аравдугаар сарын 31-ний өдрийн 10.50 цагийн байдлаар Улаанбаатараас Дархан руу явах замын Баруунхараа орох хэсэгт том оврын ачааны машин гулган зам хааж, зогсжээ. Иймд элс цацаж, том оврын машиныг гулгаатай замаас гаргасан байна. Иймд жолооч нар автомашиндаа өвлийн дугуй тавьж, хурдаа тохируулан зорчихыг анхааруулж байна.
Цас нийт нутгаар үргэлжлэн орох ба 31-нээс баруун, төв болон зүүн аймгуудын нутгийн зарим газраар ялимгүй хур тунадас орно. 11 дүгээр сарын 1-нд нутгийн хойд хэсгээр, 2-3-нд нутгийн зарим газраар цас орж, зөөлөн цасан шуурга шуурна. Салхи ихэнх хугацаанд секундэд 7-12 метр, 1, 2-нд Алтайн салбар уулсаар, 3-нд нутгийн баруун хагаст түр зуур секундэд 16-18 метр хүрч ширүүсэж, шороон шуурга шуурна.
Дархадын хотгор, Алтай, Хангай, Хөвсгөл, Хэнтийн уулархаг нутаг, Завхан голын эх, Хүрэнбэлчир орчим, Идэр, Тэс голын хөндийгөөр шөнөдөө -14…-19 градус, өдөртөө 0…-5 градус, Эг-Үүр, Хараа, Ерөө, Орхон, Сэлэнгэ, Туул, Тэрэлж голын хөндийгөөр шөнөдөө -9…-14 градус хүйтэн, өдөртөө 0…+5 градус, говийн бүс нутгийн өмнөд хэсгээр шөнөдөө -1…+4 градус, өдөртөө +9…+14 градус дулаан, бусад нутгаар шөнөдөө -4…-9 градус хүйтэн, өдөртөө +3…+8 градус дулаан байна гэж ЦУОШГ-аас мэдээллээ.
