Маргааш буюу арванхоёрдугаар сарын 18-наас 1-5 дугаар ангийн сурагчдын хичээлийг, арванхоёрдугаар сарын 25-наас ахлах ангийн сурагчдын хичээлийг цахимаар хичээллүүлэхээр болсон билээ.
Түүнчлэн өвлийн улирлын амралтыг арванхоёрдугаар сарын 28-наас нэгдүгээр сарын 28-н хүртэл үргэлжлүүлэхээр шийдвэрлэсэн. Үүнтэй холбогдуулан БШУ-ны сайдын шийдвэрийг Боловсролын Ерөнхий Газар (БЕГ)-ын дарга Т.Ням-Очир танилцууллаа.
Тэрбээр “Дээрх шийдвэртэй холбоотойгоор эцэг эх, асран хамгаалагчид бага насны хүүхдээ гэртээ харах хүнгүй үлдээх нөхцөл байдал үүснэ. Тиймээс ААН болон төрийн байгууллагууд бага насны хүүхдээ харах хүнгүй гэртээ үлдээж буй ажилтандаа тодорхой хугацаатай чөлөө олгохыг уриалж байна.
Ахуйн осол гэмтэлд хүүхэд өртөх бүхий л нөхцөлөөс урьдчилан сэргийлэх арга хэмжээ авах хэрэгтэй. Цаашдаа цэцэрлэгийн үйл ажиллагаа хэвийн үргэлжилнэ. Гэхдээ эцэг эхчүүд харж хандах хүнтэй бол хүүхдээ цэцэрлэгт өгөхгүй байх боломжоор цэцэрлэгийн удирдлагууд хангах ёстой.
Өнөөдөр шийдвэр гарч байгаа учраас хөдөө орон нутгийн сургуулийн дотуур байрны асуудал үүснэ. Ялангуяа өвөлжилт хүндэрсэн сумуудад зам харгуй хаагдсан байгаа. Тиймээс өвөлжилт хүндэрсэн, зам харгуй хаагдсан тохиолдолд хүүхдүүдийг арванхоёрдугаар сарын 29-ний өдрийг хүртэл дотуур байранд нь амьдруулах зохион байгуулалт хийнэ үү.
Цаг агаар эрс хүйтэрч томуу, томуу төст өвчний тохиолдол өндөр байгаа учраас цэцэрлэг сургууль дээр төвлөрсөн олон нийтийн арга хэмжээ зохион байгуулахгүй байхыг зөвлөе. Нэн ялангуяа ерөнхий боловсролын бага ангийн сургуулийн үйл ажиллагаа цахим руу шилжсэнтэй холбогдуулан байгууллагууд шинэ жилийн арга хэмжээг хязгаарлахыг уриалж байна.
Өчигдөр 21 аймгийн удирдлагуудтай хуралдахад цэцэрлэг, сургуулийн байрнуудын дулаан алдалтын асуудал ихээхэн хөндөгдсөн. Агаарын дотор температур нь 10 градус хүрсэн тохиолдол ч байна. Тиймээс дулаан алдалтыг бууруулах чиглэлээр аймаг орон нутгийн удирдлагууд цэцэрлэг сургуульд дэмжлэг болж ажиллахыг уриалъя.
Хичээл сургалтын үйл ажиллагаа цахимд шилжсэнтэй холбогдуулан эцэг эх асран хамгаалагч нараас төлбөр нэхэх, хүүхдэд хэт өндөр ачаалал үүсгэх бие даалт, гэрийн өгөхгүй байхыг зөвлөж байна” гэв.
