УИХ-ын чуулганы нэгдсэн хуралдаанаар УИХ-ын 2024 оны ээлжит Сонгуулийн тойрог байгуулах тойргийн мандатын тоо, дугаар, нутаг дэвсгэрийн төвийг тогтоох тухай тогтоолын төслийг хэлэлцэж байна.
Энэ үеэр сонгуулийн зардлын тухай Сонгуулийн Ерөнхий Хорооны Хууль, эрх зүйн хэлтсийн дарга Д.Бат-Эрдэнэ хэлэхдээ “Сонгуулийн зардлын тухайд Сонгуулийн тухай хуульд нэр дэвшигчээс гарах зардлыг бууруулах тухай олон дэвшилттэй зохицуулалт хийсэн. Тухайлбал
- Сонгуулийн сурталчилгааны арга хэлбэр, түүнд ногдох тоо хэмжээг 50 хүртэлх хувиар бууруулсан
- Төрийн аудитын байгууллага зардлын дээд хэмжээг тогтоохдоо өмнөх оны гүйцэтгэл болон хэрэглээний үнийн индекстэй уялдуулж, бодитой тогтоож байх боломжийг бүрдүүлсэн.
Хэдийгээр сонгуулийн зардлыг бууруулах эрхзүйн орчин бүрдсэн боловч зардлын хэмжээ тойрог томорч байгаатай холбоотойгоор өмнөх сонгуулиудтай харьцуулбал тодорхой хэмжээнд нэмэгдэж тогтоох байх. Хуульд зааснаар гуравдугаар сарын 1-ний өдрөөс өмнө Үндэсний аудитын байгууллага сонгуулийн зардлын дээд хэмжээг тогтоох зохицуулалттай” гэв.
“СОНГОГЧ ТУХАЙН МАНДАТЫН ТООТОЙ ТЭНЦҮҮ ХЭМЖЭЭНИЙ САНАЛЫГ ТЭМДЭГЛЭЖ, САНАЛ ТООЛОХ ТӨХӨӨРӨМЖИД УНШУУЛАХ ЁСТОЙ”
Сонгуулийн Ерөнхий Хорооны гишүүн Д.Баяндүүрэн “Сонгуулийн хууль тогтоомжид заасны дагуу сонгогч тухайн мандатын тоотой тэнцүү хэмжээний саналыг тэмдэглэж, санал тоолох төхөөрөмжид уншуулах ёстой. Санал тоолох төхөөрөмжид илүү буюу дутуу тэмдэглэгдсэн санал уншигдахгүй тул санал гээгдэх асуудал гарахгүй.
Мандатын тоо нэмэгдэж байгаатай холбоотойгоор Сонгуулийн Ерөнхий хорооны зүгээс сургалт сурталчилгааны ажлыг сайн зохион байгуулж, онцгойлон анхаарах шаардлагатай. Саналын хуудсанд бүх сонгогчид санал тэмдэглэх заавар очдог. айл өрхүүдэд санал тэмдэглэх талаарх мэдээллийг цаасан хэлбэрээр хүрдэг. Контент хэлбэрээр мөн хүрдэг” гэв.
