УИХ-ын нэгдсэн чуулганы өнөөдрийн хуралдаанаар Засгийн газраас өргөн мэдүүлсэн Гадаад хөрөнгө оруулалтын тухай хуулийн шинэчилсэн найруулгын төслийн хэлэлцэх эсэхийг хэлцлээ.
Хэлцэхийг дэмжих эсэхээр санал хураалт явуулах гэтэл УИХ-ын гишүүдийн ирц хангалтгүй байгаагаас санал хураалт явуулалгүй, завсарлалаа.
Түүнчлэн, уг хуулийн төслийн талаар гишүүдийн байр суурь харилцан адилгүй, шүүмжлэл их байгаа учраас хэлэлцүүлгүүд зохион байгуулсны дараа хэлэлцэх эсэхээр санал хураалт явуулна гэдгийг УИХ-ын дарга Г.Занданшатар мэдэгдэв.
Гадаадын хөрөнгө оруулалтын тухай хуулийн шинэчилсэн найруулгыг төслийг Улаанбаатар хотоос сонгогдсон гишүүд ихээхэн дэмжиж байгаа бол зарим гишүүн хөрөнгө оруулалт нэрээр хэт давуу байдал олгох заалтууд орсонд шүүмжлэлтэй хандаж байв. Гадаадын хөрөнгө оруулагчидтай Тогтворжуулалтын гэрээ байгуулж, татварын хөнгөлөлт, чөлөөлөлт үзүүлэх асуудлыг шүүмжилж байв.
Түүнчлэн, Засгийн газрын гишүүдээс Х.Болорчулуун, Ц.Даваасүрэн нарын гишүүд уг хуулийн төслийг дэмжихгүй байгаа байр суурийг илэрхийлж байв. Эл үйлдэлд нь УИХ-ын дарга Г.Занданшатар, УИХ-ын Д.Ганбат нар шүүмжлэлтэй хандлаа. Ядаж Засгийн газрынхаа өргөн мэдүүлсэн хуулийг танхимын гишүүд нь дэмжиж, нэгдсэн байр суурьтай хандахыг санууллаа.
УИХ-ын гишүүн Д.Ганбат: Энэ танхимынхаа эсрэг ажиллаад байгаа сайд нараа огцруулаач ээ. Ч.Хүрэлбаатар та Монгол Улсын шадар сайд биз дээ. Засгийн газрын танхим нэг зарчим барьж ажиллах ёстой. Гэтэл сайд нар өөр, өөр эсрэг юм яриад байна. Шадар сайд энэ эсрэг ажиллаж байгаа сайд нараа огцруулаач.
УИХ-ын дарга Г.Занданшатар: Хөрөнгө оруулалт нь хөрөнгө оруулагч түншдээ ч, хөрөнгийг шингээж байгаа Монгол Улс, Монголчуудад ч үр өгөөжтэй байх нь чухал. Тиймээс энэ хуулийн хэлэлцүүлэгт гишүүд онцгой анхаарч, хэлэлцүүлгийн явцад засч сайжруулах хэрэгтэй.
Сая 2-3 асуудал давхардаж их яригдлаа. Нэгд, уг хуулийн төслийг өмнө нь Эдийн засгийн байнгын хороогоор хэлэлцэхэд Газрын тухай хуультай зөрчилдөж, ард иргэдийн эсэргүүцэлтэй тулаад Засгийн газар буцаад татаж авсан. Одоо хүчин төгөлдөр үйлчилж байгаа Хөрөнгө оруулалтын тухай хуулийн 12.1.1-д зааснаар хөрөнгө оруулагч заасан хугацаандаа газрыг эзэмших, ашиглах эрхтэй гээд хуульчилсан юм байна лээ. Энэ хуульд байгаа зөрчилтэй асуудлаа нэг мөр болго л доо. Энэ заалтад гадаадын хөрөнгө оруулагч, дотоодын хөрөнгө оруулагч хоёулаа хамаарч байгаа. Аль нэгийг нь хориглочихоор чинь шударга бус өрсөлдөөн болохоос гадна энэ заалтыг шууд хориглоод тийм, үгүй гээд байх түвэгтэй. Одоо оруулж ирж байгаа Хөрөнгө оруулалтын тухай шинэ хуулийн төсөлдөө маш олон татварын хөнгөлөлт үзүүлнэ гээд заасан. Гэтэл тэр хөнгөлөлт чөлөөлөлт нь тэгш шударга биш байна. Хэн нэгэнд давуу байдал ойлгож, нөгөө дээрэмддэг байдал үүсэх эрсдэл бий. Тогтворжуулах гэрчилгээ өгнө гэж байгаа нь зүйтэй нэг хэсэгт өгөөд нөгөө хэсэгт өгөхгүй гэхээр дахиад л нөгөө давуу байдлууд үүснэ. Тиймээс ард түмэн, хөрөнгө оруулагчдыг сайтар мэдээллээр хангаж, нэгдсэн ойлголттой байх хэрэгтэй. Хэлэлцүүлгүүд сайн явуулж, нэгдмэл ойлголттой болсны дараа санал хураалт явуулна. Нэн ялангуяа Засгийн газрын гишүүд нэгдсэн ойлголтод хүрэх хэрэгтэй. Засгийн газрын өргөн барьсан хуулиудыг Засгийн газрын гишүүд нь УИХ-ын танхимд орж ирээд маргалдаад унагааж, гацаачихдаг болчихлоо. Үүн дээрээ онцгой анхаарахыг сануулъя. Энэ хууль хөрөнгө оруулагчдыг даллан дуудах итгэлцлэл болох учиртай шүү гэлээ.
