Засгийн газрын хуралдаанаар энэ асуудлын талаар УОК, НОК-ийн мэдээллийг сонсоод, орон сууцыг нь засварлах хүртэл 207-р байрны 61 өрхийг түрээсийн байраар хангах, үүнд шаардлагатай 1.4 тэрбум төгрөгийн санхүүжилтийг Засгийн газрын нөөц сангаас гаргахаар шийдвэрлэсэн. Айл өрхүүдийг орон байраар хангах ажлыг НЗДТГ хариуцан ажиллахаар болсон юм.
Эдгээр асуудлын талаар УОК, НОК-оос мэдээлэл өгч байна.
УОК-ын нарийн бичгийн дарга, хурандаа Т.Баярхүү “Дэлбэрэлтэд өртсөн 19 настай иргэн нас барсан харамсалтай явдал тохиолоо. Одоогоор нэг иргэний биеийн байдал нэн хүнд, дөрвөн иргэн хүнд, найман хүн хүндэвтэр байна. Эмнэлэгт хүргэгдсэн 27 иргэн дэлбэрэлт болох үеэр ойр орчимд зорчиж байсан.
Гал түймэрт өртсөн орон сууцны иргэдийг хоёр зочид буудалд байрлуулсан. Өнөөдөр зарим айлууд түрээсийн байраа олсон гэсэн мэдээлэл ирүүлсэн. Дэлбэрэлтэд хоёр орон сууц, хэд хэдэн үйлчилгээний байгууллагын барилга, нийт 35 тээврийн хэрэгсэл өртсөн. Үүнээс 29 автомашин бүрэн шатсан байна.
Мөрдөн шалгах ажиллагаагаар бодит хохирлыг тогтооно. Шатсан орон сууцыг үнэлэх ажлыг ажлын хэсэг байгуулаад үнэлэн шалгах ажиллагаа явагдаж байна. Мөн иргэдийг буруу ташаа мэдээлэл түгээхгүй байхыг хүсэж байна. Олон нийтийн сүлжээгээр олон хүн дэлбэрэлтэд өртөж нас барсан ч нуун дарагдуулж байна гэх ташаа мэдээлэл тарсан. Энэ бол худал мэдээлэл. Хүний амь настай холбоотой асуудлыг ямар ч үед нуун дарагдуулах боломжгүй.
Аливаа гамшиг, гэмтлийн үед орон байраа алдсан үед Засгийн газар хариуцах үүрэгтэй. Дараа нь Засгийн газрын нөөц сангаас зарцуулсан төсвийг буруутай этгээдээс гаргуулах болно” гэлээ.
н.Мишигдорж “Хохирлын хэмжээг тогтоохоор шинжээчид томилогдон ажиллаж байна. Шинжилгээ хийх хугацаа 14 хоног байдаг. Шинжилгээний хугацаа нөхцөл байдлаас хамааран сунаж болдог” гэв.
