Өчигдөр “Эко авто машин импортлогчдын холбоо”-ноос нийслэлд олгох тээврийн хэрэгслийн улсын бүртгэлийн дугаарын дээд хязгаар тогтоох тухай шийдвэрийг эсэргүүцэж мэдээлэл хийсэн. Өнөөдөр НИТХ-аар тээврийн хэрэгслийн улсын дугаарыг хязгаарлаж үнэ тогтоох асуудлаар хэлэлцэж байна. Энэ үеэр тус холбооноос НИТХ-ын дарга Ж.Батбаясгаланд эсэргүүцэж буй шаардлагыг хүргүүлэв.
“Эко авто машин импортлогчдын холбооны төлөөлөл“НИТХ-аар иргэдийн эрх ашиг, нийслэлийн хөгжлийг хэлэлцэж, тогтоол журам баталдаг болохоос иргэдийн өмчлөх эрхийг хааж боодог байж болохгүй. Иргэд дунджаар 20-30 сая төгрөгт автомашин худалдаж авч байна. Гэхдээ зээлээр л худалдаж авч байгаа шүү дээ. Машинаа зээлээр авна, нэмээд дугаарын үнийг тогтоочихвол иргэд худалдаж авч чадахгүйд хүрнэ. Х.Нямбаатар шударга ёс тогтооно гэж энэ албан тушаалд томилогдчихоод буруу хууль тогтоох гээд байна. Өөр зөндөө гаргалгаа байхад иргэдээ дарамталсан хууль журам гаргаж болохгүй.
22 цогцолборт 5-6 мянган дугаараа аваагүй худалдаалах гэж байгаа автомашин байна. Хэрвээ улсын дугаарт хязгаар тогтоочихвол автомашины үнэ багадаа 5-10 сая төгрөгөөр нэмэгдэнэ. Учир худалдаа эрхлэгчид машинаа зарахын тулд үнээ өсгөж л таарна.
Автомашин худалдаалдаг төвүүд, Япон улсаас захиалсан машин, гаалийн хяналтад орох гэж буй маш олон машин байгаа. Одоо энэ хууль батлагдчихвал иргэд болон худалдаа эрхлэгчдэд маш их дарамт үүснэ. Нийслэлийн нийтийн тээвэр тухтай, хүрэлцээтэй байсан бол автомашины эрэлт багасна шүү дээ. Гэтэл автобусны асуудлаа шийдээгүй байж, иргэдэд дарамт үүсгэж болохгүй. Хотын дарга болон НИТХ-ын төлөөлөгчид энэ шийдвэрээ буцааж харахыг хүсэж байна” гэв.
