“Японы сүмо бөхийн холбооноос сүмогийн их аварга Хакүхо М.Даваажаргалд түүний дэвжээний бөх Хокүсэйхотой холбоотойгоор торгууль ногдуулах магадлалтай гэж Kyodo мэдээллээ. Японы сүмо бөхийн холбоо (JSA) баасан гарагт шуурхай хуралдаан зарласан бөгөөд удаа дараагийн зөрчил гаргасан гэж үзэж буй Хокүсэйхо А.Даваанинжийн талаар хэлэлцэх аж.
Өнгөрөгч нэгдүгээр сарын башёд маэгаширагийн 8-аас барилдсан, 22 настай Хокүсэйхог дэвжээнийхээ доод зиндааны бөхчүүдэд бие махбодын хүчирхийлэл үйлдсэн гэж үзэж байгаа юм.
Сүмо бөхийн дээд зиндаанд 45 удаа түрүүлэн дээд амжилт тогтоосон, 65 настай Хакүхо Хокүсэйхогийн харьяалагддаг Мияагино дэвжээнд багшилж буй. JSA-ын түр хорооноос тус дэвжээний удирдлагыг шүүмжилсэн бөгөөд Хакүхог дэвжээний багш нарын хамгийн бага цол руу бууруулах санал дэвшүүлжээ. Энэ нь дэвжээний багш нарт өгдөг гурав дахь хүнд шийтгэл юм. (Ажлаас халах, тэтгэвэрт гарахыг санал болгохын араас)
Лхагва гарагт болсон уулзалтаар Хакүхо энэ асуудлын талаар мэдээгүй гэсэн бол Хокүсэйхо зодог тайлахад бэлэн гэжээ. Нэгдүгээр сарын башёгийн зургаа дахь өдөр Шинэ жилийн уулзалт болоход Хокүсэйхо бэртлийн улмаас оролцоогүй бөгөөд тухайн өдөр хэрэг үйлдэгдсэн гэж JSA-ын түр хороо үзэж байна.
Эх сурвалж: Kyodo
